“Na kabuya bieu ta konopá nobo” i ku e dicho ei dilanti por spera mas inovashon di Vidanova e aña aki durante di selebrashon di nan 50 aniversario. Direktora di e kompania Charlene Alberto a duna splikashon di kon bin Vidanova ta asina eksitoso i kiko futuro lo tin pendiente.

Vidanova ta un fondo di penshun ku ta ofresé penshun kolektivo na su miembronan. Nan a kuminsá na aña 1968 e tempu ei ku kompanianan di e sektor energétiko, despues di utilidat i na 2001 a habri e porta pa kompanianan di tur sektor por afiliá. I banda di esaki nan a aktivo riba tur 5 isla ku tabata forma Antia Ulandes.

E echo ku ta trata aki di un fondo di penshun ku ta hasi penshun kolektivo ta nifiká segun sra. Charlene Alberto ku mester tin un relashon di trabou i por lo ménos 2 hende den servisio. Nan no por ofresé penshun na hende individual pero tòg nan a krea e posibilidat ku hendenan por bin sera penshun serka nan.

Mitar siglo di eksistensia no ta fásil pa kualke empresa yega na dje sin por papia di ta eksitoso. E direktora a splika ku un di e faktornan masha kla ta e tim. Nan tin un tim dediká di hendenan ku ta komprondé penshun i ta sinti ku ta nan ta Vidanova i semper nan ta bai ‘extra mile’ pa e kliente, nan ta skucha i pa asina por keda bon na altura di kiko ta pasa internashonalmente. Den esaki semper ta keda analisá si kisas loke nan ta ofresé por ta hopi karu i ounke e ta bon pero e mester fet den nan situashon i semper pa mira si por adaptá esaki. E tim kombiná ku vishon teniendo kuenta ku merkado ta ofresé i desaroyando i fleksibilidat. Fleksibilidat pa keda un fondo sólido i ku apesar di tempunan ku tin.

Importante pa penshun

Penshun a bira manera un “stop woord” aktualmente. Tur hende ta papia di penshun. Charlene Alberto a bisa ku nos tur konosiendo hende grandi sintá ta traha komo bewaker ta traha i no pasobra nan ke pero pa motibu di nesesidat. Lamentablemente tin hende ta ora ta yegando edat di penshun ta kuminsá pensa riba esei. Penshun mas bien ta un “uitgestelt loon” esta un tipo di salario ku bo tin di bai kobra despues. Pues si regla esaki for di tempran, ora bo yega e edat di penshun no ta solamente esun di SVB/AOV bo ta bai kobra pero bo tin esun di trabou tambe ku apesar bo no ta traha mas, bo tin un entrada pa biba for di dje.

Nivel di entrada ta nesesario?

Ora ta papia di penshun, ta importante pa kua nivel di entrada e persona tin? Riba e pregunta aki sra. Charlene Alberto a splika ku esaki no ta importante. Vidanova tin dos diferente areglo; unu ta e ‘Define benefit’ esta ta definí delantá ki benefisio bo ke i kiko bo ta bai paga i e otro ta ‘difine contributions’ kaminda e persona mes ta definí kiko ta su kontribushon den e penshun, na final ta wak kuantu a hinka den dje i kuantu plaka e hende ei ta bai haña na penshun. Lamentablemente segun sra. Alberto hopi hende ta wak e prima di penshun komo un gastu sin realisá ku ta e gastu ei ta duna bu e benefisio despues. Biba sin penshun ta un gastu ku sigur mester evitá.

Mester konsiderá penshun komo parti di loke ta paga awor aki. Meskos ku ta paga belasting, konsiderá penshun parti di e gastu ku mester saka pa disfrutá di dje despues.

Lei di penshun obligatorio

Charlene Alberto a splika ku tin un lei di penshun obligatorio den preparashon aktualmente. Tin un konsepto di lei kaba ku un partido polítiko a entregá i gobièrnu a tum’é over i ta sigui kana kuné. E ta masha nesesario pasobra eksperensia a mustra ku si lag’é na e hende mes pa regl’é, esaki no ta tuma lugá. Un investigashon hasí algun aña pasá a mustra ku 50% di hendenan no tin e penshun ei reglá i esei ta hopi. Ora hasié obligatorio gobièrnu ta obligá tur hende pa pensa mihó riba su futuro.

Stèndert internashonal

Vidanova komo un fondo di penshun eksitoso ta tene debido kuenta ku stèndertnan internashonal. Manera e direktor a splika nan semper ta wak direktor di afó. Ta sòru kumpli ku reglanan di banko sentral an promé lugá pero semper mirando mas aleu por ehèmpel kiko Ulanda ta bezig kuné i ku por yega aki banda. Sigur sigur nan ta wak afó pa asina fortifiká mas.

Sertifiká ISO

For di 1998 Vidanova ta sertifiká ISO tambe i e proseso ei ta ku tur aña nan ta bin a kontrolá i wak si e sertifikado ku a haña ei si ta un biaha so a sòru pa por a hañ’é? I kada 3 aña ta tene oudit kompleto pa wak si por keda ku e sertifikado. I Vidanova ta orguyoso ku tur aña ta pas’é bon i a keda ku nan sertifikado.

I pa su personal tambe Vidanova ta sòru pa e personal keda al dia. Charlene Alberto a splika ku no solamente di gerensia pero pa esnan ku diariamente ta traha den e penshun ta sa kiko ta pasando i asina por wak kiko por yuda e kliente kuné, kon manehá riesgo di otro manera. Ta un parti integral di maneho i ISO ta eksihí esei tambe.

Selebrashon 50 aña

Vidanova a inisiá su selebrashon dia 25 di aprel ku ta e fecha riba kua a kumpli 50 aña. Tabata un resepshon pa relashonnan, direktornan, bankonan, HRM nan, un grupo di invitado a selebr’é. Esei tabata e inisio. Nan ta konsiente ku no por a logra e 50 aña si kompanianan, nan trahadónan no a konfia Vidanova. I den yüni lo amplia e selebrashon ku miembronan. Ta selebrashon na Kòrsou pa hende ku ta paga prima òf kobra penshun. Tin otro selebrashon na Saba, Statia, St. Maarten i na Boneiru pasobra tur einan tin miembro. I ta klousurá ku e selebrashon pa personal.

Tep pe empresario

Sra. Charlene Alberto komo direktor di un kompania eksitoso a manda konseho tambe pa empresarionan. El a pidi pa krea bo mes realidat. Nos ta parti ekonómiko, gobièrnu tin un ròl importante pero nos kada un tambe tin e. No sinta warda pa si ekonomia bai bon bo dal stap. Den kaso di Vidanova, nan ta lansa un kompania nobo ku ta Vidanova Life, un kompania di seguro.

Proyektonan

Vidanova ta trahando riba Vidanova Life ku lo bira realidat dia 1e di yüni. Un oportunidat pa tur hende por yega na nan penshun sin tin di forma parti di e kolektividat. Sra. Charlene Alberto a splika ku mirando e nesesidat nan ta krea e posibilidat pa hende individual sera su penshun serka nan. Hopi biaha por mira mucha yònnan ta bai riba nan mes i e hendenan ei por sera nan penshun serka nan. E hendenan ku den penshun a kuminsá lat i no por alkansá via trabou un penshun sufisiente tambe por akumulá penshun adishonal. Vidanova Life ta krese oportunidat pa krea nan penshun.

Tambe ta trahando riba un plan di parselashon kaminda lo bai traha kas. Aña  pasá a inisiá un proyekto di apartamentu na Coral Estate. Ku esaki Vidanova ta demostrá ku nan no ta sinta warda oportunidat pa mira si nan por invertí pero na mes ta krea nan oportunidat pa asina tambe por kontribuí na ekonomia di Kòrsou. I pa yega asina leu na e konstrukshon di kas, nan a hasi un estudio pa mira kiko realmente e hende tin mester. I riba esei a sigui traha.

Selebrashon a kuminsá Na bieu ta konopá nobo

....I e selebrashon di Vidanova a kuminsá dia 25 di aprel último, riba kual fecha e kompania ta selebrá su 50 aña. Entre e grupo grandi di invitadonan tabatin representantenan di empresa i otro instansianan afiliá na Kòrsou, Boneiru, St. Maarten, Saba i Statia ku ta forma nan penshun na e fondo aki pa nan empleadonan. A hasi uso di e oportunidat aki pa anunsiá lansamentu di un entidat nobo ku ta “Vidanova Life”.

Durante e parti ofisial ku a inkluí diskursonan, sr. Anthony Haile presidente di e hunta di supervishon di Vidanova a para ketu na lantamentu, strukturá  e papel spesial di e hunta ku e ta presidí. Presidente di e Hunta di Direktiva, Humberto d’Abreu de Paulo a toka e strategia di IFS, esta ku banda di e penshun ta brinda un pakete mas amplio posibel di servisio finansiero integral. E pensamentu tras di esaki ta pa por duna e klientenan e servisio i produktonan ku nan por tin mester durante nan bida. Den esei ta inkorporá tambe e pasonan resien di Vidanova Bank.

E direktor di Vidanova, sra. Charlene Alberto, a anunsiá e ramifikashon nobo, esta Vidanova Life. Esaki ta un kompania di seguro di bida ku entrante dia 1e di yüni próksimo lo bai ofresé entre otro penshun individual i seguro di bida, no solamente na esnan afiliá, pero tambe na hendenan privá. Den e tempu benidero lo duna mas detaye i informashon al respekto.

Na bieu ta konopá nobo:

Despues a sigui ku anunsio di e introdukshon di Vidanova Life, kompañá pa un show espektakular kaminda nan a kombiná bieu ku nobo. E grupo di baile di Cesario a bini ku e baile tradishonal di sinta, usando kabuya pa e okashon aki, siguí pa dos hóben di Cirque Magique ku nan movementunan akrobátiko pa te na final e dos gruponan konopá e kabuya bieu na esun nobo.