Si CMC reanudá kuido elektivo pa pashèntnan di SVB

WILLEMSTAD.- Den un karta fechá 20 di òktober, 2021, Inspektor di Salubridat, Prof. Sirving Keli ta eksigí pa Curaçao Medical Center (CMC) kontinuá ku kuido elektivo pa pashèntnan di SVB entrante djaluna 25 di òktober, 2021. Pero esaki no ta responsabel sin e fondonan pa kubri e gastunan di material i remedi, asina gerensia di hospital CMC ta splika.

CMC ta insistí ku si kontinuá e servisionan aki sin e fondonan rekerí, lo por tin konsekuensianan fatal pa pashèntnan di emergensia, kuido agudo òf ku mester di kuido esensial entre e próksimo luna te ku fin di aña.

Den un karta di djadumingu 24 di òktober, CMC ta splika inspektor ku CMC su deber ta pa kumpli ku tur kuido di emergensia i tratamentunan agudo i esensial. Ademas di ta un responsabilidat étiko médiko esaki ta rekerí pa lei tambe. Pues si CMC kontinuá kuido elektivo pa pashèntnan di SVB na e momentunan aki, esaki lo tin komo konsekuensia ku lo yega un punto den e próksimo lunanan ku no tin e material ni e remedinan nesesario pa por ehèmpel trata un pashènt ku mester dialisá, risibí kemoterapia, radioterapia, òf den un aksidente. Mas detaye den edishon di EXTRA.