Zahir Dalnoot ta dediká su tempu na resiklá materialnan di paña entre otro i yega na loke nos por konsiderá komo arte. Praise Collection ta loke Zahir ta forma parti di dje. I el a konta Djasabra kiko por spera di dje.  Zahir a gana aña pasá e premio di Inovashon pa su tasnan.

Zahir a bisa e no mester di introdukshon, e tabata un temporada será na SDKK i einan a bin ideanan nobo ku a impaktá e instansia di teknologia. Tambe riba retnan sosial i a gana e premio. Zahir a bin ku e parti di tas. Nan Swagged Fab ta produsí paña i tas, stul di outo, muebel i tur kos ta preis redusí.

Eksklusivo....

Loke ta hasi na otro di loke eifó ta tumando lugá riba e mesun tereno segun Zahir ta ku nan ta sigurá e eksklusividat di e obra. E tas ku nan entregá ta un so tin i tambe e ta analisá otro tasnan di marka i ta repliká esaki mas reforsá i agregá kos ku ta hasié diferente.

Di nóutiko pa kose....

Zahir a bin di un mundu nóutiko. Esei tabata su trabou i awe su bida a kambia i e ta kose. Nunka el a pensa esaki pero el a bin di famia ku ta un di e ‘stoffederijnan’ mas bon na Kòrsou. E konosementu pa ku kosementu e tin e di su tanta pero tòg nunka el a pensa di hasié, i awor e ta hasié. E ta gradesí Kenneth.... den Sentro di Detenshon i Korekshon Kòrsou ku ta un persona ku e konosé for di chikí i ku no a duda ni dos bia pa a siñ’é e trabou. Tambe  ta gradesí Malvina Cicilia ku a karga e proyekto i a sigui pusha ku e departamento ei por a krese i loke Zahir ta loke e ta i tin mas ku a sali for di einan i ku awe ta den kosementu.

Spesialisá den tas...

E ta spesialisá den tas. Tas di skol nan ta produsí di kalidat haltu pasobra e idea tabata ku el a tuma su tempu pa analisá tempu e ta den SDKK kon e ta mira na televishon e parti di tentamentu di muchanan. El a pensa hopi bia na Kòrsou ku ekonomia difísil kon por produsí tas ku e mayor no por paga marka karu i haña un mas barata pero duradero. Asina ta evitá ku mucha ta tenta otro na skol.

Skolnan ta eksihí...

Skolnan tambe ta eksihí pa tasnan di vaknan i ta difísil pa haña esaki. Tambe ta eksihí tas di un koló i serka nan di Swagged Fab nan ta trah’é manera e hende ke, e tamaño ku e ke, e koló ku e ke. Ta djis bin ku diseño, nan ta sinta ku e kliente, analisá e produkto i trah’é òf drech’é. Tambe nan ta duna konseho ora ta trata di stul. Tin bia hende ke renová stul, e ta duna konseho ku asta ora renová e stul un hende no ta ni rekonosé e stul pero ta kere ku ta nobo. “Tur kos ta posibel serka nos”,asina Zahir a enfatisá.

Dikon tira jeans afó, ta un material duru i por lag'é. Hopi di su tasnan e ta djis bent’é den wasmashin kompleho, i sak’é. E tas no ta kibra. E no ta betòn pero e ta bai hopi aña asina Zahir a bisa.

Aseptá bo pasado....

“Bida no a kaba pero a kambia, dado momentu bo tin di aseptá bo pasado pa biba bo presente. Esei ta importante pa hóbennan. Tur kos por pasa tur hende SDKK ta pa tur hende i no pa kosnan hopi grave so, pero kosnan chikí tambe. Importante ta ken bo ta na final, kiko i kon bo ke yega. Esei ta e meta ku e i Pisas den Banda Bou ke trese un kambio. Hopi bia gobièrnu ta pensa e kosnan difísil siendo ku ekonomia ta malu i bo ke baha gastu i nos ta pidi yudansa pero no ta haña ni di komersiante ni niun hende. Si bin kambio pa ku esei nos por trese kosnan muchu mas barata pa e pueblo”, Zahir a enfatisá. Zahir tin algu mas ku un aña kaba ku e produkshon di tasnan. El a bisa Djasabra ku e tin e aseptashon den pueblo pero e ta kere ku por mihó. Ketu bai e ta mira ku nos hendenan no ta patriótiko. “Si wak por ehèmpel un chines, nan ta sostené otro ounke e produkto por ta mas karu. Na Kòrsou nos falta esei, nos no ta uni i no ta apoyá un otro yu di Kòrsou”, Zahir a enfatisá. I si wak ku Kòrsou ta importá tur kos, aki no tin fábrika di traha tas i loke nan ta hasiendo na un krenchi pa aportá na ekonomia di Kòrsou. Swagged Fab ta e empresa mama i Prais Collections ta e tasnan i hopi mas.

Tayer Sta Martha...

Intenshon ta pa un dia lo por yega na eksportashon. Ta un soño ku sigur lo bira realidat segun Zahir. I meskos nan ke aportá mas na komunidat. Zahir a bisa ku tin e tayer di Sta Martha ku tambe nan por aportá na dje. Nan ta pidi un chèns pa duna nan e tayer pa duna training na e hendenan einan i tambe na nos hóbennan. I esaki ta e petishon ku nan ta hasi na gobièrnu pa kere den nan i duna nan un chèns ku  e tayer.

Kontakto...

I den e temporada di Karnaval aki, Zahir a bin ku algun idea nobo manera Buiktas i tasnan ku por usa spesial pa karnaval. Kolónan yamativo. I pa esnan ku ke bin den  kontakto ku nan por subi Facebook i buska Swagged Fab, like e page einan por haña kontakto ku nan na telefòn 662-4479. Por traha sita ku nan òf tambe nan mes por yega kaminda e kliente ta.  Si tin hende ku tin material nan ta tuma nan pa por yega na nan produkto final. Sea paña, material pa kosementu, tur ta bon biní.