...Riba foto por mira dak ku a bai i tambe wayanan di Flow ku a lòs i tabata kologá...

WILLEMSTAD.- Ayera tabatin un bientu fuerte a lanta den oranan di mèrdia pone ku esaki a ranka dak di un kas den Moonchiwegbai kuné komo tambe wayanan di Flow. Téknikonan di Flow mester a presentá pa por a atendé e wayanan ku a lòs i tabata kologá kual tabata un peliger p’esnan den besindario.
For di ayera den oranan di mainta, Servisio Meteorológiko a emití kódigo Hel pa bientu fuerte i ku laman ta brutu ku olanan haltu na kosta nort i ost.
Den nan boletin di ayera tardi ku ta keda na vigor te awe mainta, Servisio Meteorológiko a informá ku tin un sistema fuerte di preshon haltu ku lo move den direkshon ost i establesé su mes pa e siguiente dianan riba Atlántiko i tambe nort di Karibe. E diferensia den preshon di airu riba e region den ost di Karibe lo bira mas grandi, di manera ku e forsa di bientu tambe lo oumentá. Komo resultado, kondishon di laman lo keda brutu i pa e motibu aki a emití un mensahe di prekoushon pa usuarionan di laman. Miéntras tantu, nubianan lo sigui pasa de bes enkuando den e área di nos isla i laga algun áwaseru di durashon kòrtiku kai riba partinan di nos isla. Te ku ayera nochi lat, e kódigo Hel a keda na vigor. Pues awe tambe lo tin bientu fuerte, meskos ku ayera nochi.