WILLEMSTAD.- E bientunan fuerte ku a bini ku pasada di Bret banda di nos isla, a laga algun bario den skuridat ayera nochi. Manera servisio meteorológiko a indiká ku Bret a alehá di nos isla, pero nos lo haña algu di áwaseru i tambe bientu.

Ayera nochi e bientunan tabata basta fuerte, i dor di esaki  diferente aria na Bándariba, Dominguitu, Wèspùnt i algun aria mas a keda sin koriente.  E motibu di esaki ta debí na bientu duru ku konsekuensia ku suichnan den e ret ta bula, wayanan ta kai.

Aqualectra a bisa ku tanten ku tin hopi bientu ku áwaseru ta difísil i peligroso pa nan por hasi e trabounan den e ret di koriente. P’esei Aqualectra a pidi e esnan den e áreanan  afektá komprenshon pa esaki.