WILLEMSTAD.- Kòrsou a skapa di tormenta Bret. Sinembargo basta áwaseru i bientu fuerte a okashoná problema na vários parti di Kòrsou. Tantu polis komo brantwer tabata man yen for di den oranan tempran di anochi, bai sigui kue mardugá di awe. Na Suffisant den van Krimpenlaan un palu a kai djis pegá ku un kas di koriente miéntras ku den Muizenberg e bientu fuerte a basha praktikamente tur kliko abou. Den saliña wayanan di koriente tabata zuai bai bin riba kaya i esaki na su turno a duna e empleadonan di Aqualectra hopi trabou. Na Bandabou tabata kaminda e bientu parse tabata mas fuerte. Nos a keda informá di diferente kas ku a pèrdè nan dak i tambe palunan grandi ku a kai.