Lio Plantijn presidente Sitek; Purba haña esnan maskulino tambe

WILLEMSTAD.- Ku aña eskolar nobo den porta, presidente di Sitek Lio Plantijn a menshoná algun punto di importansia pa pone atenshon riba dje. El a toka e punto di embeyesimentu ku ta aselerando. Den su kaso mes nan a kaba un grupo di 30 na 1986 i e añanan promé tambe i nan tur ta den proseso pa baha den e próksimo añanan i no ta mira ku ni dunadó di trabou ni gobièrnu e esfuerso pa promové e profeshon di dosente.

Plantijn ta kòrda ku algun aña pasá nan a bin ku e proposishon dikon gobièrnu no ta aserka mayornan di e muchanan den gruponan uniformá, mayornan di muchanan ku a representá Kòrsou den kualke kos edukashonal i ku a sinti e patriotismo ei, dikon no aserka nan ku un pakete ku nan ta haña èkstra atenshon si nan skohe pa bira dosente. Duna e mayornan fasilidatnan di por ehèmpel belasting, duna e muchanan tambe sierto fasilidatnan pa asina promové., “Nos ta bai haña situashon i mi no ta spera esei gobièrnu ta bai usa ku muchanan ta bira tiki pa hasi e skolnan tiki i yena klasnan. Presupuesto di enseñansa no a baha masha i por mantené e suma ku tin i hinka profeshonalnan banda di e maestro  asistente pa yuda e muchanan”, Lio Plantijn a bisa.

Riba e punto di skarsedat di maestro Plantijn a bisa ku asina tin un penshonado ta yuda den enseñansa ta nifiká ku tin skarsedat. Tin awor aki algun penshonado. Den skolnan avansá tin sierto materia ku no tin dosente pa esaki. I banda di esaki Lofo ku no a krea un bida ainda pa ta un instituto di formashon di dosente. E ta den kurá di Universidat i tur hende a duna Sitek rason ku un instituto di formashon no por ta den kurá di un universidat, pero tòg el a keda einan ku tur e limitashonnan i e bareranan. Un instituto di formashon di dosente no por ta mei mei di studiantenan ku no tin purá di kaba nan estudio. E ta kere den un akademia di formashon riba su kurpa para i independiente.

Banda di esaki e ta kere ku ta bon pa ICUC i UoC hasi un investigashon bou di hóbennan maskulino dikon nan no ta interesá den enseñansa. Awor aki tin skolnan ku no tin ni un mener ta traha aden i tur ta hende muhé. No mester krea e pensamentu serka nos muchanan ku ta un komunidat di hende muhé nos tin. Mester hasi un manera i ora haña e resultado wak kon ta bai motivá un grupo di hóben maskulino kon pa drenta e mundu di enseñansa.

Plantijn tambe ta haña ku mester krea insentivonan pa atraé hóbennan. I den e kuadro ei e ta kontentu di a tende e direktor di direktiva di skolnan katóliko bisa ku mester drecha e salario di maestronan. Sitek tin 30 aña ta bis’e i e direktiva di skol katóliko a bis’é. I ta spera ku e mensahe a bolbe yega serka gobièrnu.

Na 2016 dia nan a wèlga Plantijn ta kòrda di tabata sinta ku ministernan di e tempu ei i e presidente di e komishon negoshadó i ora nan a mira e salario di dosentenan nan a keda babuká kon abou e salario ta. Nan a hasi komparashon ku polis tin mayoria bia preparashon MBO i nan ta gana kasi dòbel kompará ku e maestro ku preparashon HBO.