WILLEMSTAD.- “Forsa di un supmarino ta ku e por hasi sierto kos den sekreto. Mi no por bisa nada tokante situashon polítiko den otro pais.” Asina teniente di marina Erwin Ruijsink a splika ayera. Ruijsink ta komandante di supmarino di Marina Real Zr. Ms Zeeleeuw. EXTRA a puntra Ruijsink ayera durante un bishita di prensa na e supmarino, si e supmarino awor ta na Kòrsou den kuadro di situashon na Venezuela. Manera ta konosí na Ulanda, i tambe na Kòrsou, tin hopi preokupashon tokante situashon na Venezuela.

Na Kòrsou tin un Taskforce Venezuela ku ta vigilá e situashon den e pais. E Taskforce ta un tim multidisiplinario ku ta atendé i ta monitòr e situashon.

Na ulanda tin hopi miedu ku un ola di refugiado for di Venezuela por subi kostanan di Kòrsou, Aruba i Boneiru. Ruijsink no por divulgá nada tokante e situashon polítiko. “E supmarino estilo Walrus a tuma parti na ehersisionan den Karibe huntu ku unidatnan di Kuerpo di Marina. Nos a trein ku e ‘speshal forces’, ku ta buladó ku a siña pa investigá sierto parti bou di awa, òf di un boto òf riba tera, sin niun otro hende por wak nan. E ta un manera pa haña informashon òf hasi otro kos, ku ta hopi spesialisá. E supmarino aki por ta bou di awa di forma invisibel, sin saka zonido i p’esei ta masha difísil pa otro hende haña sa di dje.”

Ruijsink: “Pero pa bin bèk, riba bo pregunta di Venezuela: e ehersisionan di e supmarino na Kòrsou  tabata planiá kaba. Esaki no tabatin di aber ku e situashon na Venezuela.”