Tin funshonnan ku no tei mas, tin esnan ku a desaroyá i tin hopi funshon nobo

WILLEMSTAD.-Nos mundu manera nos konosé ta kambiando dia pa dia. E pandemia di Covid a habri hopi hende su bista ku hopi kambio ta na kaminda i tambe ku tin hopi desaroyo ku nos no por wanta nan mas. Institute for Professional Excellence (IPE) ta un organisashon ku ta sigui desaroyonan i ta organisá kursonan hustamente den preparashon di nos hendenan pa por presta den e funshonnan nobo òf esnan eksistente ku ta sigui desaroyá. Dr. Franklin Sluis ta presidente di IPE i ta splika dikon IPE ta hasi esaki.

IPE ta un organisashon ku ta konsistí di e organisashonnan SOAB, Aqualectra, CHATA i Bureau Telecommunicatie & Post. A funda e organisashon na 2012. Nan meta ta logra reorientashon di hendenan pa jobnan di futuro. Sr. Sluis ta sigui splika ku énfasis, ku entrenamentu ta algu longterm. Ta konsientemente e kuater organisashonnan aki a uni forsa pasobra ta hustamentu den e áreanan aki e nesesidat pa kapasitá i reorientá hende ta grandi. Tin hopi área den kua hendenan a pèrdè trabou na Kòrsou.

E presidente di IPE ta mustra tambe ku e mihó invershon ku por hasi, ta invershon den kapital humano. Na hopi okashon por tende e punto di preokupashon pa solushon di sierto situashon òf problema ta algu ‘longterm’. Un análisis ta mustra i demostrá ku esei ta pensamentu di falta di vishon, pasobra si a tuma desishonnan ‘longterm’ 3 òf 5 aña pasá e pais aki lo no ta konfrontando sierto problemanan ku tei ketu bai. Un ehèmpel konkreto ta e falta di personal kalifiká den vários sektor.

No por keda piki e frutanan ku ta kologá abou so (low hanging fruits) i laga esnan mas haltu den e palu keda para putri! Stòp di plania pa awe i plania pa futuro. IPE a kuminsá ku kurso pa vigilante spesialisá. Na final di e kurso e trahadó ei ta bon prepará pa traha den vários sektor!

Pandemia

Durante di e pandemia fronteranan a sera. Esei a habri hopi hende su wowo, ku awor si mester produsí nos propio kuminda. Den e kuadro ei IPE a kuminsá prepará i konsientisá hende pa kultivá nos propio kuminda. IPE a logra prepará un kantidat di riba 300 hende den diferente ramo di agrikultura, esun tradishonal, sintropiko i vários otro mas. Algu sumamente importante ku e agrikultornan moderno aki a siña ta ku plantashon di fruta i berdura por tin hopi pèst i den mundu ta usa hopi pestisida pa kontrolá e problema di pèst. Sin embargo naturalesa mes tin su sistema kon pa atendé ku tantu pèst. Tin mata ku na momentu ku plantanan den serkania di un otro fruta òf berdura, esaki mes ta sòru di protehá ku e fruta òf berdura no ta haña pèst. Hasiendo esaki no ta nesesario pa usa pestisida.

Tur esakinan ta parti di e vishon pa konstruí un nashon sabí. Ta hasi uso di teknologia pa por prepará hende pa dil ku tur reto ku ta bini riba komunidat. Keda pendiente pa un siguiente artíkulo ku mas detaye.