WILLEMSTAD.- Niandy Windster-Losiabaar ta biuda di rèper Boechi, ku a keda likidá fin di 2022 na Kòrsou. Den e wikènt ku a pasa Niandy Windster-Losiabaar a duna un entrevista na korant hulandes ‘Eindhovens Dagblad’ relashoná ku e tratamentu di e kaso fin di òktober di e aña aki na Kòrsou. Lo tin dos sospechoso den korte durante tratamentu di e kaso. “Pero ami no konosé  nan. Un di nan ta famia di Boechi, pero no ta un miembro di famia hopi serka. Nos no tabatin niun kontakto kuné.”

Dia 27 di òktober benidero kaso kontra dos sospechoso di asesinato di Boechi lo tuma lugá na Kòrsou. Dia 30 di yüni tabatin kaso ‘pro forma’ di asesinato di rèper Boechi. Den e kaso ‘pro forma’ wes a papia ku e dos sospechosonan enkarselá relashoná ku e kaso aki.

Manera ta konosí dia 9 di desèmber 2022 Ruchendell Bonifacio Windster konosí komo Boechi a keda likidá riba Rooseveltweg. Dia 7 di aprel Hulanda a detené e hòmber Churendy Coffie (44) komo promé sospecho di ta envolví den e asesinato. Dia 26 di aprel outoridatnan na Kòrsou a detené e hòmber Chris Zimmerman (24) den un kas na Mexicoweg komo e di dos sospechoso.

Despues di tratamentu di e kaso ‘pro forma’, dia 18 di yüli, tim di polis Divishon di Krímen Organisá konhuntamente ku e Tim di RST a hasi dos detenshon mas relashoná ku e kaso di asesinato ku a haña e nòmber Hummer. Ta trata di e hòmber sospechoso D.M.G. di 44 aña i un muhé sospechoso J.C.R. di 38 aña di edat ámbos nasé na Kòrsou. Nan ta keda sospechá di tin vínkulo ku e kaso aki. Riba òrdu di Fiskal di Ministerio Públiko, a tene un entrada hudisial na un adrès den Kaya Aura Winkel kaminda polis a haña i konfiská un arma di kandela i un  kashi di bala ku bala ku posiblemente por ta e arma ku a usa durante e asesinato.

Niandy Windster-Losiabaar den e entrevista ta splika ku e ke ta presente durante tratamentu di e kaso fin di òktober na Kòrsou. “Polis no ke bisa mi nada promé ku tratamentu di e kaso. Uniko kos ku nan ta bisa mi ku mi tin ku prepará hopi bon.” Segun Niandy rònt Kòrsou hopi hende ta papia tokante e kaso.  “Hopi hende ta kere ku nan sa kiko ta e motibu. Pero te ainda mi no sa nada.” Niandy ta bisa ku na un banda e no ta interesá pa sa kiko e motibu tampoko. “Pasobra segun mi no tin niun bon motibu pa mata un hende.”

Manera ta konosí durante tratamentu pro forma, Zimmerman a indiká ku un hende a paga pa e asesinato. Segun Coffie nan a hòrta Boechi ku violensia pa motibu di su kadena. E ta indiká ku e no tabata un asesinato planiá.