A saka e damita na estado

WILLEMSTAD.-  Korte di promé instansia a trata otro kaso di violashon seksual kontra di menor. E akusado I.L.(32) ku ta un bombero, ta keda akusá di a violá  ruman muhé di su frei ku e tempu ei tabatin 14 aña. Segun e akusashon, e tabata kometé aktonan di inmoralidat ku e damita den tur sentido di palabra.

Banda di esaki e ta keda akusá di a saka e damita na estado.  E akusado ku ta den libertat pendiente tratamentu di su kaso, a presentá den sala di korte pa responsabilisá su mes pa su akto.

Wes a relatá ku tur kos a kuminsá na momento ku mayornan di e damita, a deskubrí  ku e no a haña su regla. Esei a pone ku nan a hasi un prueba di embaraso kuné, pa motibu ku e  no kier a papia i bisa kiko tabata pasando.

Ora ku e prueba a sali positivo, e hobensita a disidí konta kiko a pasa kuné. El a splika ku e akusado ku ta frei su ruman muhé mayó i ta biba den kas ku nan komo persona di konfiansa, ta esun ku tabata hasi sex kuné . Esaki tabata sosodé anochi ora ku tur hende tabata drumi. Segun e víktima  e hòmber tabata drenta den su kamber, baha su karson i penetr’é. El a hasi esaki 5 bia. Dia ku e ruman a bai hospital e tabata hasi sex kuné regularmente. E tabata bisa e hòmber pa stòp i bai fo’i su kamber, pero esaki no a hasié kaso.

Momento ku e mayornan di e hobensita a bai dòkter kuné, a resultá ku e tabatin 19 siman na estado.

Tabata 1 siman promé ku el a hasi 15 aña. Debí ku e tin un kurpa di mucha i tabata hopi frágil, naturalesa a pone ku el a haña un miskraam.

A konfiská e feto manda esaki NFI pa hasi DNA. A resultá ku e akusado tabata e tata biológiko di e feto. Segun e damita, nunka e tabatin a kurashi di konta su mayornan kiko tabata pasando i tampoko  grita ora e akusado tabata riba dje.

E damita ta un mucha ketu, sumiso i no gusta papia tokante di e tópiko nan aki.

Awe mainta e akusado tabata kabes abou den sala di korte durante tratamentu di e kaso. El  ninga tur akusashon. Segun e akusado, nunka el  a mishi ku e kriatura. E no sa mes dikon e ta bisa ku el a mishi kuné. E akusado a bisa mas aleu ku fo’i 5 aña pasa ku su mama a fayesé, su bida a kambia. El a hañ’e ku hopi difikultat.

Fiskal a puntra e akusado dikon e ta keda ninga ku el a mishi ku e damita, mirando ku e tin prueba di DNA ku e ta tata biológiko  di e feto. Segun fiskal, komo bombero e akusado mester tabata sa mihó.

Miembro di Slachtoffer hulp a bisa ku e víktima tabata un mucha trankil, frágil. E no tabata sa mes kiko tabata pasando kuné.

Kada bes e tabata wak e feto den su telefòn.  E víktima ta hopi troumatisa i e kaso aki a trese hopi tristesa i hopi problema den famia. Frei di e akusado ku ta e ruman muhé di e víktima, a kibra kontakto ku e famia i no ta atendé ku nan mas.

Fiskal a duna di konosé den su rekistorio ku e akusado ta ninga tur kos, pero e no por duna un otro splikashon. E no por bisa kon bini su spèrma a yuda forma e feto di e damita.

Segun fiskal e akusado a tacha desaroyo seksual di e víktima. Esaki a kousa daño na e salu mental i tambe  trauma serka esaki.

Ta trata di un menor di 14 aña ku a sali na barika, pero a pèrdè e yu. Segun fiskal e akusado no a asumí su responsabilidat, pero a keda ninga tur akusashon. Fiskal a duna di konosé ku e akusado no a mustra niun tiki duele pa su aktonan. Mirando tur esakinan fiskal a yega na un demanda di 6 aña pa e akusado i a pidi wes pa detené e akusado mes ora .

Abogado di e akusado a bisa entre otro den su defensa, ku e damita mes tabata laga porta di kamber habri, despues di e promé bia ku e ta bisa ku su kliente a hasi sex kuné.

E abogado ta di opinion ku mester duna su kliente benefisio di duda den e kaso aki.  Na final e akusado a duna di konosé ku e ta lamentá ku el a hañ’e den un kaso asin’aki.

Wes a  bisa ku e tin ku bai deliberá i lo tuma desishon dia 20 di yüli 1.45.