WILLEMSTAD.- Presidente di partido MAN Payo Schoop ta bisa ku tin tur señal ku screening di Steven Martina a bai bon, ounke e no a haña konfirmashon ainda di formador. Esaki ta nifiká ku mester skùif hende pasobra MAN ta un partido di prinsipio i palabrashon. Riba e pregunta di EXTRA ku apesar di e bon akohida ku sra. Giselle McWilliam a haña den e lunanan ku el a asumi e funshon komo minister di Desaroyo Ekonómiko tòg man ta mantené nan palabrashon interno, e presidente a bisa ku si.

Pues dentro di poko por mira ku McWilliam ta bai Staten bek i Steven Martina ta bira minister miéntras ku Payo Schoop ta sali for di Staten pa asina McWilliam drenta Staten bek.

Pa loke ta trata e prestashon ku McWilliam a duna, Schoop a bisa EXTRA ku MAN ta kontentu ku McWilliam a drenta i mesora a demostrá kurashi, tuma desishon riba asuntunan ferfelu i asta a logra ku Kòrsou a haña mas komunikashon aéreo ku Miami loke a nifiká mesora un redukshon di e tareanan astronómiko ku ta eksistí na momentu ku tin un kompania di aviashon so.

Segun Yves Schoop, McWilliam a hink’é den un situashon difísil, pasobra den un periodo kòrtiku McWilliam a drenta i haña bon akohida pa su trabou, sinembargo no ta e so ta tuma desishon i p’esei ta sigui reglanan establesé kaba di direktiva di MAN ku ta bisa ku mester respetá palabrashon hasí.