WILLEMSTAD.-Defensa ulandes a logra benta di kuater (4) kas mas djabièrnè último. EXTRA ta sigui desaroyonan den komunidat i manera a informá resientemente a tuma lugá benta di kasnan di defensa serka notario Funf-A-Loi Samandar. A bende e promé set di kasnan dia 6 di novèmber i e di dos set i kasnan dia 13 di novèmber.

E notisia positivo ta ku a logra bende tur e kasnan. Di hendenan ku a partisipá EXTRA tin informashon ku e suma inisial pa mayoria di e kasnan tabata bou di 200.000 i a logra bende e kasnan na un suma un poko mas haltu. Den mayoria kaso esnan ku a kumpra e kasnan ta ulandes oropeo.

Den pasado tabata asina ku defensa ulandes tabata konstruí kasnan na sierto área i asina ta aloká famianan di e personal di defensa den e kasnan aki. Den mayoria kaso e personal ta bini ku su famia pa un periodo di 3 aña i despues ta bai bek. Teniendo e kasnan defensa no mester a buska kas pa aloká su personal i nan famia.

E biaha aki tambe a hasi uso di dos kura pa tene e findishi ya asina a tene bin kuenta ku distansia sosial i otro reglanan den kuadro di Covid.