WILLEMSTAD.- Lo bai tin henter un pakete finansiero mará na e akuerdo ku e firma entre Kòrsou i Hulanda. Hulanda lo bai invertí mas ku 75 mion Euro den diferente sektor, i por bisa ku lo bai tin debido atenshon pa e sektor di agrikultura, krio di bestia i peska. Na momentu ku un persona entregá un proyekto ku ta faktibel i rendabel, ku e ta sirbi bienestar i adelanto di nos pais, e lo risibí sosten di parti di COHO. Esei Minister di Desaroyo Ekonómiko, sr. Steven Martina, a duna di konosé durante e enkuentro ku prensa na okashon di firmamentu pa lantamentu di e entidat ariba menshoná (Caribisch Orgaan voor Hervorming en Ontwikkeling).

T’asina ku e akuerdo aki ta enserá ku lo bai tin un pakete destiná pa invershon.

Ku e akuerdo aki Hulanda ta pone adishonal un total di 30 mion euro disponibel pa infrastruktura di enseñansa, 25.3 mion euro pa mehorá estado di derecho i un máksimo di 20 mion euro pa drecha e klima di invershon i hasi negoshi pa medio di un instrumento di garantia ku mester ta efektivo i fásil pa logra. Tur esaki ta invershonnan ku ta kontribuí na un desaroyo ekonómiko duradero ku ta krea kupo di trabou. En partikular, e mehoransa di e klima di invershon, di hasi negoshi i akseso fásil na finansiamentu, lo ta importante pa e mundu empresario i rekuperashon ekonómiko.

Segun sr. Martina, den e kapítulo ekonómiko di COHO lo bai promové tur sektor relevante, i agrikultura, krio di bestia i peska ta algun di nan. I mesun importante ta pa presentá ku un plan faktibel i rendabel. Na momentu ku esei ta e kaso, e finansiamentu via di COHO lo bira disponibel.

Di su parti Sekretario di Estado sr. Raymond Knops a splika ku debidamente lo tin atenshon pa agrikultura. Por sierto, e ta oriundo di un famia di kampesino i komo tal agrikultura ta algu ku e tin hopi na pechu. Es mas, e ta kere ku Kòrsou lo por probechá grandemente di e konosementu i ekspertisio ku Hulanda tin di ofresé riba e tereno aki. Hulanda lo por nifiká hopi riba e tereno aki, aunke tin di aber ku klimanan diferente.

Kòrsou a eksperensiá kaba e konsekuensianan di un krísis na Venezuela, unda fronteranan a sera. El a proba kon dependiente Kòrsou i otronan tabata di Venezuela. I agrikultura lo por forma parti di e pakete di desaroyo. I Hulanda ta ofresé e konosementu i ekspertisio ku e tin riba e tereno aki. Produkshon lokal lo baha e kostonan di kuminda saludabel.