KRALENDIJK/THE BOTTOM — Mirando ku e kantidat di kasonan aktivo di Covid ta subiendo na Boneiru, entidat di salubridat públiko na Saba a kambia Boneiru su posishon den komo pais di alto riesgo. Esaki ta nifiká ku tur persona ku ta yega e isla for di Boneiru, mester tèst i tambe bai dies dia den karentena. Asina Jonathan Johnson, kende ta gezaghebber di Saba, a duna di konosé.

Aktualmente tin 70 persona na Saba den karentana i te asina leu tur hende ta manteniendo na mes na regla, Johnson a indiká.

Vakuna

Minister di Salú Públiko, Desaroyo i Deporte, Hugo de Jonge, a duna di konosé ku Saba lo disponé di sufisiente vakuna pa tur hende. Johnson a splika ku pronto lo bin mas informashon relashoná ku esaki atraves di un vidio pa duna informashon.

“Awor ku ta konfirmá ku nos lo risibí e vakuna, e tim di maneho lo diskutí internamente kon e proseso pa habri Saba su frontera lo sosodé. Esaki lo bai na mesun manera ku na 2020, esta na un manera gradual, unda a tuma pasonan nesesario pa garantisá i mantené seguridat públiko. Mi ke yama un danki na  tur hende pa nan pasenshi,esfuerso i di sigui kumpli ku reglanan di higiena”, Johnson a duna di konosé.

Speransa

Ta opvio ku rondó di Saba, kasonan di Covid ta lantando kabes riba diferente isla. Na mes momento a kuminsá ku vakunashon na diferente pais. E aña aki tampoko lo ta un aña `normal`, pero tin perspektiva i speransa pa kosnan normalisá bèk.

Johnson a duna di konosé ku entidat públiko a uni forsa ku `Saba University School of Medicine`, ku lo risibí 70 studiante e semèster aki. Durante un reunion ku e dos partidonan, a pone enfoke riba tur persona ku ta bini Saba mester entregá tur papelnan nesesario dos siman delantá.

“Den muchu kaso ta sosodé ku e informashon pidí ta yega sea lat òf inkompleto. Nos ke mantené Saba seif, i p’esei ta importante pa kumpli ku tur regla imponé”, Johnson a terminá bisando.

 

LAGA UN KOMENTARIO

Please enter your comment!
Please enter your name here