KRALENDIJK  – No ta posibel mas pa biaha bai bin riba e mesun dia pa Kòrsou sin ku hasi un test di PCR. Entrante 23 di novèmber 2020 tur pasahero for di Kòrsou ku ta biaha pa Boneiru mester a laga hasi pa mas tardá 72 ora promé  ku salida un tèst  di PCR. Resultado di e tèst  mester ta positivo. Pasahero ku no a laga hasi un tèst di PCR, no por subi avion pa bai Boneiru.

Boneiru ta bini ku regla mas estrikto awor ku e kantidat di kaso di Covid-19 na Kòrsou a oumentá basta, na e isla ei tin awor 640 kaso di hende ku a pega ku e vírus. Na Boneiru tabatin delaster dos simannan seis kaso nobo di Covid-19 ku a bini aserka. Ta trata abitante di Boneiru. Departamento di Salubridat Públiko sa unda fuente di e kasonan akí ta. E kasonan akí tin direktamente òf indirektamente di aber ku Kòrsou.

Pasahero ku ta bini Boneiru for di Kòrsou mester bai yena e Deklarashon di Salubridat Públiko digital entre 48 i 72 ora promé ku nan buelo. No ta aseptá  deklarashon riba papel mas na yegada na Boneiru.  Por yena e Deklarashon di Salú  riba www.bonairepublichealth.org

En bista di e kantidat di kaso di hende ku a pega ku e vírùs na Kòrsou i Boneiru, ta konsehá pa biaha solamente si esei ta nesesario. Ta konsehá biahero di Boneiru ku ta bai den eksterior,  pa tene nan mes na e reglanan di corona di e pais ei.

LAGA UN KOMENTARIO

Please enter your comment!
Please enter your name here