KRALENDIJK.- For di awe mainta Entidat Públiko Boneiru ta na altura di e situashon na Venezuela. Gobièrnu ta vigilando e desaroyonan kuidadosamente i ta den kontakto ku e organisashonnan enbolbí na Boneiru, na Hulanda Karibense i den Reino Hulandes.

Pa e próksimo 24 ora, espasio aéreo den e region aki ta parsialmente será. Esaki ta nifiká ku temporalmente buelonan internashonal pa i for di Boneiru no ta tuma lugá. E buelonan entre e islanan den área karibense sí ta kontinuá por lo pronto.

Gezaghèber a indiká ku e organisashon di krísis ta aktivo. E organisashon aki ta vigilá e situashon minusiosamente i ta evaluá si medidanan adishonal ta nesesario. Siguridat i bienestar di  habitantenan i bishitantenan ta sentral den esaki. Promé minister Dick Schoof a duna di konosé ku, si esaki ta nesesario, Boneiru por konta ku sosten di Hulanda. Entidat Públiko Boneiru ta den kontakto ku gobièrnu hulandes tokante esaki. Asina ku tin informashon nobo disponibel, ta kompartí esaki via e kanalnan ofisial di komunikashon di Entidat Públiko Boneiru.

Entidat Públiko Boneiru ta hasi un yamada na habitantenan i bishitantenan pa keda trankil i  sigui informashon solamente via e kanalnan ofisial.