Cleopa: Tur trahadó ta igual

WILLEMSTAD.-  Si gobièrnu tin sèn pa paga un grupo di trahadó di Curaçao Medical Center (CMC) un bónus fin di aña aki, e mester tin sèn pa paga tur su otro trahadónan tambe. “Gobièrnu komo doño di trabou no por ta deskriminá”, kolaboradó di frakshon di MAN den parlamento, Eugene Cleopa ta trese dilanti.

Cleopa ta bisa ku el a tuma nota ku minister di Finansa, Javier Silvania a pone sèn disponibel riba presupuesto di kuido di CMC pa duna e trahadónan di hòspital CMC un bónus fin di aña aki. Esaki riba su mes no tin nada robes kuné Cleopa ta bisa, mirando ku e trahadónan di CMC ta hasi un tremendo trabou i ta meresé risibí un bónus di fin di aña. Na mes momento sinembargo e ta mustra ku gobièrnu komo doño di trabou no por ta saka sèn pa paga esun trahadó miéntras ku un otro, por ehèmpel su propio trahadónan ta haña nada. “Gobièrnu no por ta deskriminá entre trahadónan.”

Cleopa ta supliká gobièrnu pa e trèk e mesun liña i banda di trahadónan di CMC paga tur ámtenar tambe i evitá un kaso igual ku a pasa na 1979 bou di èks minister Rozendal kaminda tur trahadó a eksigí ku nan mester kobra e asina yamá “gevarenpremie”. “Mester trata tur trahadó igual i paga tur tambe bónus di gobièrnu na desèmber awor.”

E ta mustra mas aleu ku den pasado ta e trahadó públiko bou di “schaal” di salario 5 so tabata haña un bónus di 250 florin fin di aña serka gobièrnu komo doño di trabou. “Pues si awe por duna sèn pa paga e trahadó di CMC bónus, pa kua nos ta kontentu pa e trahadó, gobièrnu mester paga alabes tur trahadó di gobièrnu i kompanianan di gobièrnu, manera Curiol, Curgas, Aqualectra, CPA, TeleCuraçao i CTB djis pa menshoná algun.”

Finalmente e kolaboradó di frakshon di MAN ta mustra ku ta tur trahadó tin ku bai e mesun supermerkado, pòmp gasolin i paga e mesun resibunan di awa i koriente, “pues no por tin deskriminashon.” Cleopa ta atvertí ku gobièrnu no mester brua tampoko e debe ku e tin na ámtenarnan ku e bónus. “Esakinan ta dos kos distinto. E debe ta trata pago di ‘loontrede’ òf lumpsum na e antena ku ta bai bèk te 2019 i ku gobièrnu a primintí di paga pa mas tardá desèmber awor, miéntras ku e bónus ta un suma fiho ku tur trahadó ta haña meskos na fin di aña.”

Foto:

...Eugene Cleopa...