WILLEMSTAD.- E bòrchinan di propaganda polítiko situá na rotònde  di Palu Blanku a kuminsá bini abou.

Esaki despues ku ayera mardugá shofùr di un vehíkulo a pèrdè kontrol i dal ku su vehíkulo den e bòrchinan aki. No tabatin ningun persona ku a resultá herida pero si daño material.

Manera ta konosí, dia 8 di febrüari último VVRP a laga pone steker riba diferente bòrchi di propaganda polítiko na vários parti riba nos isla debí ku esakinan a keda pone sin un pèrmit i tambe nan ta pone tráfiko den peliger. E dia ei VVRP a laga pone e steker nan kaminda ta informá esnan responsabel ku nan tin dos siman pa kita e bòrchinan di propaganda polítiko sino VVRP mes lo laga kita esakinan riba kosto di e doño.

Entre tantu e siman aki ta kumpli e dos siman nan. Ayera por a tuma nota ku vários di e bòrchinan aki a kuminsá bini abou i a keda benta riba e rotònde. Esaki por ta algu hopi peligroso debí ku si un bientu fuerte pasa, e bòrchinan por bula bai dal den vehíkulo.