WILLEMSTAD.- Awe ta kumpli 9 luna ku Kòrsou a konosé e di dos kaso di asesinato pa aña 2020 kaminda e hòmber Jahier Rudolph Evertsz, nasé na Kòrsou dia 13 di yanüari 1990 a pèrdè su bida. Bosero di Kuerpo Polisial di Kòrsou Imro Zwerwer a indiká na EXTRA ku e sospechoso mayó Xiomar Girigori Remigio Winklaar (alias Taito), ainda ta profugo di hustisia.

Riba e dia en kuestion alrededor di algu promé ku mitar di ocho, Sentral di Polis a risibí informashon ku den Kaya Neblina na Ser’i Papaya  tin un kaso di tiramentu i ku tin un hòmber gravemente heridá.

Polis ku a yega a topa ku un hòmber drumí abou den situashon kritiko ku diferente herida di bala na e parti ariba  di su kurpa. A pidi presensia di ambulans, pero e personal no por a hasi nada mas pa e víktima. Dòkter di polis ku tambe a yega na e sitio, a konstatá morto di e hòmber Jahier Rudolph Evertsz, nasé na Kòrsou dia 13 di yanüari 1990. For di investigashon preliminar a sali na kla ku tabatin problema entre algun hóben inkluyendo ruman di e víktima ku no tabatin nada di aber ku e diskushon pa asuntu di tiramentu di dònderbos riba otro. Despues a surgi un bringamentu ku a bin terminá ku e tiramentu den Kaya Neblina, ku e konsekuensia ariba menshoná.

Polis huntu ku Ministerio Públiko ta realisando investigashon pa mas pronto posibel hasi detenshon di esun kulpabel i pa solushoná e kaso aki. Den kuadro di esaki, un biaha mas ta hasi un súplika na komunidat pa koperá ku informashon ku por yuda na detenshon di e hòmber sospechoso Xiomar Girigori Remigio Winklaar (alias Taito), nasé na Kòrsou dia 31 di mart 1999 i bibá na Kaya Meteorológiko 47.

Detenshon di e sospechoso aki ta importante. P’esei Ministerio Públiko ta duna un rekompensa di 5 mil florin na e informashon ku por kondusí na detenshon di e sospechoso i/o solushon di e kaso aki.

Pa duna tep riba e kaso aki, por yama e number anónimo di polis 108. Kuerpo Polisial i Ministerio Públiko ta konta riba yudansa di komunidat pa por solushoná e kaso aki tambe.