Felis dia

Esta dushi áwaseru. Bosina ta spera nos por haña un poko mas di awa di shelu. Lag’é kai trankil pa asina e por drenta suela.

Yen hende, inkluso kuerpo polisial a duna komentario ku nan a keda desepshoná i asombrá ku na Hulanda a pasa programa ku periodista hulandes a graba huntu ku polis na Kòrsou. E kosnan aki ta pasa nos aki na Kòrsou pasobra nos mes ta habri porta i invitá baina. Ma karamba ki dia nos ta siña!

Koninklijke Marechaussee ke traha un dokumentario, laga nan hasié na Hulanda òf kualke otro kaminda. Dikon semper Kòrsou mester ofresé su mes pa hunga e payaso di fiesta? Koninklijke Marechaussee ke mustra kuantu droga nan ta konfiská den Karibe i un bia mas kon malu Kòrsou ta, lubidando ku ta na Hulanda tin e usadónan ku ta dispuesto na paga loke sea kontal nan haña nan droga. For di momentu ku nos sa kiko ta nan ophetivo, nos no por permití nan usa nos. Bèrgwensa, Bèrgwensa kuerpo polisial mester tin. E kuerpo lokal ta forma moketa duru kontra prensa lokal anto ta hinka periodista hulandes den patruya i bai kaso di detenshon i otro investigashon.

E kosnan aki ta pasa Kòrsou pa nos laga ko’i makaku. Kon por ta ku nos kuerpo polisial ta sera akuerdo ku kompania ulandes i no ku hendenan lokal pa traha ningun dokumentario. Drechi! E daño pa Kòrsou ta grandi, pero ta nos mes a busk’é. Esaki ta unu mas di e tantísimo kasonan ku ta tehi hende. Bo ta kere na Hulanda nos lo a haña e chèns ei? Ni de bola! Stòp di gaña boso mes i stòp di hunga abestrus.

Eks minister Girigorie por bula pipa i bisa ku gobernashon ta kontinuashon, pero esaki tambe ta riba su nòmber. Kon por ta ku un asuntu asina delikado i sensitivo kuerpo polisial por traha e dil ei sin ku minister di hustisia ta na altura!

Anto si bèrdat, MFK mester nombra un minister di hustisia pa kaba. Sea ta hasi Pisas minister di hustisia i nombra otro hende Minpres òf otro manera, kontal MFK hasi pa kaba stòp di heringá i drai manera tròm. Pero esei no ta kita, ku e baina aki ta bou di eks minister Girigorie el a tuma lugá.

Tin problema ku instituto den kuido ku ta Klínika Capriles, pero sindikato ta hiba e hendenan serka minister di finansa. Na ofisina di minister di finansa ta minister di enseñansa ta bai papia ku e trahadónan i no mester di finansa ni esun di salubridat. Shonnan no tin mas siegu ku esun ku no ke mira ni mas surdu ku esun ku no ke tende. Ta opvio ku tin kosnan ta pasando ku no ta normal. Bo no tin nodi di ta Einstein.

Bosina a bisa for di tempran ku MFK mester ‘get nan act together and fast’ pasobra 9 asiento no ta wega. Nan a haña nan ku yen di hende ku no tin eksperensia ku tur e problemanan ku esei ta trese kuné. Falta di eksperensia riba su mes no ta un problema, anto pa esei Bosina ta wak den tempu di Maria Liberia-Peters i Emily de Jongh-Elhage. Amigu i kontrinkante ta bisa ku eseinan ta promé ministernan ku a rondoná nan mes ku ekspertonan riba diferente tereno. Ademas ámbos tin un bon dósis di por skucha hende ku atenshon. MFK bin bei anto purá, sino e realidat lo ta kruel!

Te mas ratu

redactie@extra.cw