Felis dia

Shonnan nos tin un hospital nobo, masha bunita i el a kumpli dos aña. Nos tur a deseá i roga pa haña un hospital nobo, pero awe e pregunta ta si tabata un bon desishon pa kana e kaminda pa yega na un hospital nobo. Shonnan Bosina si ta konvensí ku nos mester a haña un hospital nobo. Tin grupo ku a hiba kampaña pa hospital nobo bai Otrobanda, anto awe nan ta ketu.

E echo ku e hospital a kosta 2 òf kasi 3 bia mas karu ta algu hopi kuestionabel. E problema ta ku tur esnan konserní ta tira otro ku lodo pero al final tur lo defendé otro. Nos komo pueblo mester chupa e preimu i e siguiente generashonnan mester keda paga pa sali for di e debe grandi aki. Bosina no tin niun speransa ku ora buska ulandesnan bin investigá ku e ora ei ta keda kla. E ulandesnan ta bin investigá pa nan kobra hopi plaka meskos ku tur otro, ademas ta un kos nan lo ke finalmente i esei ta mustra dede akusatorio un bia riba nos.

E kos ku Bosina ta keda lamentá ta ku mayoria di nos hendenan a siña na Hulanda. Nan no a siña so, pero a kore paranda, dal beter i tambe nan lo mester a siña tur e mañanan, ounke ta parse ku nada di e mañanan si nan no a keda kòrda. Papia un papia dos, na Kòrsou nos hustisia ta atendé ku man fuerte ku mandatario òf polítiko ku faya. Hulanda no por bisa mesun kos. Na Hulanda e polítiko òf mandatario mes ta baha bai pèrdè promé ku e asuntu bira bochincha. Shonnan ban solushoná nos asuntu, ban na serio i atendé nos asuntunan.

Ha baina, Shell a bati bèl i ta bai for di Hulanda tambe. Shonnan a kere ku Koninklijke Shell a bati bèl i bati bai for di Kòrsou nos tur a bira tristu, awèl tur hende por mira ku e hendenan aki no ta pensa dos bia ora mester tuma desishon ku ta kumbiní nan saku. E dama Marjan van Loon ta presidente direktor di Shell i el a splika ku e desishon ta pa kumpli ku loke e kompania tin mester. E gobièrnu demishonario di Rutte no a keda niun tiki kontentu ora Shell a basha nan ku e notisia.

Meskos ku Unilever, awor Shell tambe ta move bai London. Shonnan asina ta sosodé den mundu, p’esei na Kòrsou nos mester pensa bon kiko nos ke i aktua lihé. E desishon di Shell lo tin konsekuensia grave pa situashon ekonómiko na Hulanda. Esnan ku ta defendé medio ambiente lo mester bai London pa bringa nan kasonan, ora nan pensa ku Shell ta surpasá kualke nivel di polushon. Mi shon no papia mes di e kaha di plaka di gobièrnu di Hulanda ku tambe ta bai pèrdè di gana hopi hopi mion euro.

Anto papiando di Hulanda, nan ta pleita ketu bai ku ta trapa nan derechonan demokrátiko. E hulandes no ke tende ku ta tuma medida ku ta strob’é di sali kas bai keiru. Tur hende ke sigui hasi loke nan ta haña ta bon. E pregunta ta dikon Rutte ku Hugo no ta habri man laga nan hasi manera nan ke, anto ora hospitalnan no tin lugá pa atendé e pashèntnan ta laga nan muri riba pasio numa

Oei oei, Bosina a tuma nota ku den Fòrti a firma dokumentu krusial pa loke ta trata notario. Ku konosementu di Rei Wilmu òf ta na nòmber di Rei Wilmu! Asuntu masha fèrfelu!

Te mas ratu

redactie@extra.cw