Rampersad a pone esaki

WILLEMSTAD.- Na yüli 1991 un persona di fam Rampersad a pone un karta i un mapa den un bòter, i a laga esaki bai den laman na altura di Wespen. E bòter a drif i a yega te na kosta di e isla San Andres. E isla aki ta pertenesé na Colombia. E pareha Claudine i Carlos Gomez a haña e bòter, 32 aña pasá. Nan a bin Kòrsou pa buska e persona Rampersad pero lamentablemente nan ta bai Colombia bèk awe djasabra sin a logra topa kuné.

Despues di 32 aña, pareha Gomez a bin Kòrsou pa purba haña kontakto ku e persona di fam Rampersad. i EXTRA a papia ku Claudine.

E karta tabata fechá 7 di yüli 1991. Claudine a konta ku den luna di yüli 1991 den kareda di 6 or di mainta nan a sali kas i a bai kana kantu di playa pa hasi ehersisio. Carlos direpente a topa un bòter di mas òf ménos 2 liter, kisas un bòter di orea di wiski di ántes i tabata bon será i ku kokolishi den dje i tambe un papel den dje. Nan a bai ku e bòter kas kaminda nan a kibr’é pa no daña e papel den dje. Den e karta e persona ta konta ku el a mand’é dia 7 di yüli ku e mensahe, sperando ku un persona ta hañ’é. E karta a yega kosta di San Andres 21 dia despues di e fecha den e karta.

Den e karta e persona ta pone su POBox i tambe su fam Rampersad. Claudine ku ta periodista a skibi e persona ei i a mand’é i a bis’é ku nan a haña e bòter. Rampersad a kontestá nan bisando entre otro ku nan lo ta ruman di alma pa semper.

For di e tempu ei Claudine a bisa su kasá pa bai Kòrsou pero esei no a sosodé te e aña aki. Banda di e karta tambe tabatin un mapa pa mustra for di unda el a pone e bòter den laman. Awor na Kòrsou nan a buska tur kaminda, nan a asta chèk via di e POBox ku no ta riba nòmber di Rampersad mas, nan a bai e lugá ku tabatin indiká riba e mapa na Wespen i asta papia ku un polis pa yuda nan. Asina nan a logra yega EXTRA pa mira si nan por logra haña kontakto ku Rampersad òf a lo ménos ku su yunan òf famia. Claudine i Carlos ta spera algun dia di por topa kuné.

E historia aki parse manera un pelíkula segun Claudine. E playa kaminda nan a haña e bòter na Bahia Sun Bay. I e echo ku nan a haña e bòter ta manera un milager pasobra no ta nan kustumber di bai kana kantu di e playa.

Segun  Carlos Gomez a bisa EXTRA nan a warda e karta i e mapa masha bon i awor ku nan a haña chèns di bin Kòrsou nan a bolbe habri e kaha kaminda e tabata wardá pa por bin kuné Kòrsou. E historia ta hañando bida bèk.

Si Rampersad por lesa òf wak e informashon aki, e por tuma kontakto ku Valesca Diaz na EXTRA pa asina nan por haña kontakto ku pareha Gomez.