WILLEMSTAD.-E asosiashon di botikario i doñonan di botika (VAE) ta lamentá e forma kon sierto polítiko ta tresiendo informashon kompletamente robes den publisidat pa loke ta trata e asuntu di preisnan di remedi. VAE ta splika ku nan no tin influensia riba preis di remedi. Un botika ta manda kobra SVB un remedi pa e preis ku e suministradó ta fakturá, sea e ta 1 florin òf 1000 florin. E botika no tin un márgen di ganashi riba esaki. MEO ta stipulá kon haltu e preis di suministradó ta ku SVB ta paga na e botikanan. E botika ta kubri su gastunan for di e kompensashon pa resèpt, un kompensashon ku e ta risibí pa entrega di un remedi, sin importá su preis. For di momento ku na 2001 a introdusí e kompensashon aki pa entrega di remedi, e ta 7 florin, riba dje un kontribushon propio di 1 florin ku botikanan ta kobra, obligá pa lei. Tur detaye mas amplio riba e partikularidat aki den edishon di EXTRA.