WILLEMSTAD.- Asosiashon di botikario i doño di botika (VAE) a manda un komunikado di prensa tokante remedinan genériko. Segun e organisashon, botikarionan na Kòrsou ta sostené uso di remedinan genériko. Direktiva di VAE tabata hopi sorprendí ora nan a lesa resientemente den korant ku presidente di Kolegio Supervishon Finansiero (CFT) Raymond Gradus ta di opinion ku mester forsa botikarionan pa ofresé remedinan genériko, ku ta hopi mas barata ku remedinan no genériko. Segun direktiva di VAE ‘mester ta hopi kla ku botikanan ta partidario pa remplasá remedi no genériko pa remedi genériko’. Direktiva di VAE den luna di febrüari 2020 a firma un kombenio ku SVB i ex-minister Suzy Camelia-Römer. E kombenio a enfatisá importansia di uso di mas remedi genériko na Kòrsou.
Presidente di Kolegio Supervishon Finansiero (CFT) Raymond Gradus fin di yüni durante su bishita na Kòrsou a bisa ku seguridat sosial i kuido ta forma un parti importante di finansa públiko. ‘E fondonan sosial ta konfrontá défisit finansiero struktural, ku ta bai pisa mas i mas riba e presupuesto nashonal. Ta na e gobièrnu nobo pa tuma desishon tokante di e reformanan i pa ehekutá esakinan riba término
kòrtiku. Sin e reformanan aki seguridat sosial i kuido aktual lo no ta sostenibel. Un ehèmpel ta e transishon di remedinan di marka pa remedinan genériko ku e mesun efektividat. Ku e transishon aki riba término korto lo por realisá un ekonomisashon di 40 á 50 mion Naf.’ Segun VAE Gradus despues a menshoná ku gobièrnu mester pone preshon riba botikarionan pa hasi mas uso di remedi genériko.
Segun direktiva di VAE ‘por a spera for di CFT ku nan lo hasi un tiki mas investigashon den komersio relashoná ku remedinan i tambe leinan konserní.’ Segun e direktiva di VAE presidente di CFT ta pidi gobièrnu pa tuma akshon kontra botikarionan. Pero segun VAE no ta botikarionan ku ta kontra remedi genériko. Direktiva di VAE ta enfatisá ku nan ta un di e partidonan ku a konfirmá su mes na proseso di kambio. Na mesun momento VAE ta splika ku komo botikarionan nan no tin niun influensia riba e proseso. ‘Ministerio di Desaroyo Ekonómiko ta disidí preis di remedi. Botikarionan ta risibí preis di kompra plùs un kompensashon for di e aseguradó, por ehèmpel SVB.’
VAE ta enfatisá ku preis di kompensashon pa kada remedi a keda fiha a base di sifranan di 2011. ‘Nunka un indeksashon a tuma lugá.’