WILLEMSTAD.- Djabièrnè último kapitan di e barku krusero Norwegian Pearl a bati alarma ku piskadónan den serkania di e barku mester di yudansa.

Tambe e kapitan a indiká ku un boto lo a senk den bisindario di e barku krusero, pero e kapitan no a duna informashon adishonal di e personanan abordo di e boto ku a senk na ‘haventoren’. E momentu ei, e sentro di reskate i kordinashon di wardakosta  a tuma kontakto ku e kapitan pa haña mas informashon tokante e loke a pasa e mainta ei. E kapitan a konta ku nan a mira un boto ku tabata senk nèt dilanti di e barku Norwegian Pearl, i ku e personanan abordo lo a landa bai direkshon di Koredor ku algun èmber. RCC a dirigí un patruya di Wardakosta pa bai wak e situashon di e personanan ku tabata na bordo di e boto ku a senk.

Na kaminda pa e área di Koredor, nan a topa un boto di piskadó ku e dos hòmbernan riba dje. Nan a deklará ku nan tabata piskando riba nan boto ora ku un ola a bin i bòltu nan boto kual a kuminsá senk. Nan a disidí di landa pa bai buska yudansa na Koredor komo ku einan tin hopi piskadó, pa yuda nan reskatá nan boto ku tabata senk. Na yegada ku yudansa na e lokalidat, nan a nota ku nan boto a senk kompletamente. E dos piskadónan tabata bon i no tabatin mester di asistensia médiko. Nan a sigui den e otro boto bèk direkshon di Koredor.