WILLEMSTAD – Un boto di piskadó ku dos persona abordo a bin pega riba baranka na Rif, despues ku e motor a dañá miéntras ku nan tabata riba laman hasiendo nan trabou di kada dia. Afortunadamente, e dos personanan a logra landa yega tera sano i salvo.

Segun informashon ku EXTRA a risibí, e motor di e boto a daña i esaki a pone ku e piskadónan mester a landa bin tera. E boto a drif bin pega kontra e baranka na Rif, kaminda olanan tabata batiendo kontra e boto. Ámbos a landa yega tera sin ku a reportá persona heridá.

Despues di e situashon a hasi un yamada na Wardakosta pa pidi asistensia pa bin saka e boto pega. Sinembargo, segun informashon risibí, a duna di komprondé ku, komo tur dos persona tabata sano i salvo, Wardakosta no ta sali pa atendé un situashon di e tipo aki. E situashon ta poko doloroso pa e piskadónan komokiera ta wak nan kos di trabou di tur dia por keda destruí pa e laman.

Riba e fotonan por mira e boto pega riba e baranka, miéntras ku olanan ta batiendo kontra dje. Tambe por mira e motor di e boto i diferente material di piskamentu ku a keda na tera. Afortunadamente, e insidente no a terminá ku persona heridá.