WILLEMSTAD.- Den kuadro di siman di kultura 2023 tabatin e diferente aktividatnan ku a tuma lugá pa asina lanta e interes den nos komunidat pa sa mas di nos historia, kustumber i tradishonnan di pasado.

E aña aki Sentro di Bario Otrobanda tabatin un programá bon balansá i bon bishitá durante hinter e siman.

Un di e aktividatnan ku sigur a hala hopi atenshon tabata e tayer di boutismo di pòpchi siguí pa e seremonia i un selebrashon tur afó i di kita sombré.

Tur esaki a keda tres’é di un forma masha chistoso i kómiko dilanti pa e hóben Fabian Martina.

Fabian su presentashonnan durante e siman di kultura aki na Sentro di Bario Otrobanda a haña basta akohida di e forma diferente i kla ku e komo un hóben ta trese e diferente historianan dilanti.

Semper e historia di boutismo di pòpchi a keda papiá i pasá boka pa boka pero nunka no tabatin un dokumentashon skibí ku por a yega bèk na dje pa sa kiko ta tur e historia i pakiko di tur esakinan.

P’esei e hóben Fabian Martina a skibi i dokumentá e historia aki.

I pronto esaki lo ta na nos Archivo Nashonal pero tambe den bibliotekanan ku esaki por bira un medio di informashon pa esnan ku ke sa di e historia aki di boutismo di pòpchi.

Despues di e tayer duná pa Fabian Martina a sigui un selebrashon tur afó pa e yu(pòpchi) Viktoria Maria Martina ku a risibí boutismo. Den presensia di su mayornan, madrina ku padrino i tambe su yaya.

Un i tur ku a presensia e bunita akto di dokumentashon i archivo aki a keda sumamente enkantá ku e historia siguí pa e selebrashon. Riba tono i músika di kaha di òrgel mi Reina i ku grupo di baile Bunitesanan nan huntu aki a entretené tur e shen piku invitadonan ku tabat’ei presente.

Boutismo di pòpchi ta un selebrashon mas grandi ku boutismo di un yu di bèrdat.

Awor esaki ta skibí i dokumentá. Historia ta marká.