WILLEMSTAD.- Den aña 2020, Brantwer Kòrsou a realisá 101 kaso di reskate. Esaki a keda trese dilanti den nan sifranan di aña 2020.

Segun Brantwer Kòrsou ta bisa ku aparte di pagamentu di kandela, nan ta duna asistensia tambe pa skapa bida di hende i bestia. Den mayoria kaso ta trata di un “reskate” na momentu kue  víktima ta duna un situashon peligroso.

Den luna di novèmber a hasi mas tantu kaso di reskate ku ta 24, òktober 13 kaso i den luna di yanüari 12 kaso.

Brantwer Kòrsou ta duna servisio tékniko pa eliminá situashonnan peligroso tambe. Trabounan ku entre otro ta kai bou di esaki ta: atendé palunan ku a kai, atendé ku zeta riba kaminda, òf duna asistensia na momentu ku un boto ta senk. Un diferensia entre asistensia tékniko ku reskate ta ku den reskate tin bida di hende i/òf bestia na peliger i den asistensia tékniko esaki no ta e kaso.

Brantwer Kòrsou durante aña 2020 a konosé vários kandela di mondi, vehíkulo na kandela òf tambe “sushi” na kandela. Den mayoria kaso esakinan ta kandela prioridat 2, kual e unidat no ta bai ku urgensia, den kaso ku esaki no ta forma peliger direkto. Un total di 51,63% di asistensia nan den 2020 tabata vehíkulo na kandela, kandela di sushi òf mondi.

Pa resumí, den aña 2020 Brantwer Kòrsou a duna un total di 1288 asistensia, di kual 24 tabata kandela “uitslaande brand”, un total di 71 edifisio òf kas a risibí daño di kandela òf a kima kompletamente, 101 asistensia di reskate, un total di 419 asistensia tékniko i 665 kandela “buitenbrand”. Den e kantidat aki, 8 bes Brantwer a sali pa “alarma falsu”.