WILLEMSTAD.- Ayera mainta brantwer a tèst vürwèrknan di importadornan. E tèstmentu e biaha aki tin algu “spesial” kuné, debí ku e ta konta pa traha un rapòrt kompletamente nobo dje kalidat di vürwèrk ku ta drenta nos pais. E rapòrt nobo aki mester bai pa gobièrnu.
Di akuerdo ku señor James Wilson di brantwer, ku a yega ora pa traha un rapòrt nobo di vürwèrknan ku ta keda importá den nos pais. E rapòrt “bieu” ta data di 15 aña pasá, i awor ke un rapòrt nobo pa duna gobièrnu. P’esei ta tèst tur tipo di vürwèrk.
Den e 15 añanan, tabata tèst vürwèrk nan nobo ku bini aserka manera dònderbos etc. Pero awor un rapòrt kompletamente nobo.
P’e aña aki kuater komersiante/kompania a importá vürwèrk. Ta trata aki di un total di 18 kònteiner di vürwèrk a yega Kòrsou. E importadornan ta Goon Lee, Alivio, Roosevelt Center, i Chang.

Ayera a tèst e vürwèrk nan di Goon Lee so, i awe i mañan djabièrnè ta kontinuá ku kontrol di e otro vürwèrknan. Durante di tèst un di e vürwèrknan a sali di banda en bes di bai ariba. Niun persona no resultá heridá si, pero esaki a sòru pa algu di sustu mei mei di e personal di brantwer.
Pa loke ta trata e kantidat di pèrmit ku a keda entregá pa hendenan ku ta bende vürwèrk, esaki ta 58 tènt. Dia 27 di desèmber por kuminsá bende vürwèrk na hende lokal. Riba dicho dia tambe lo brantwer lo start ku kontrol di tèntnan. Un tènt por tin 400 kilo di vürwèrk ku por yega te na 500 kilo. Pero e 100 kilo mester ta bon warda. Igualmente tur hende ta para na bali i pidi loke e ke, i e bendedó ta bai kue esaki pa nan.
Presente na e tèstmentu di vürwèrk aki tabata e hendenan di servisio di medio ambiente ku a midi e desibèl.