WILLEMSTAD.-Áwaseru a kuminsá kai for di ayera nochi i a sigui den oranan di awe mainta. EXTRA a chek ku kuerpo di bombero pa tende si akaso tabatin hopi kaso ku nan mester a atendé. Mayoria hende ta kontentu na momentu ku Áwaseru ta kai debí ku e ta kibra e sekura ku ta konosí na Kòrsou. Brantwer mester a atendé algun kaso di palunan ku a kai òf dak ku a sufri daño.

For di ayera nochi te ku mainta brantwer mester a atendé ku dos kaso di daknan di kas ku a sufri daño, unu na Mahuma i un otro na Tera Kora. Pa loke ta trata palunan grandi ku tambe a sòru pa molèster brantwer mester a atendé ku dos kaso na Steenrijk, na Suffisant, St.Joris i Sta. Helena asina Jizraja Bacuna kende ta e ofisial di brantwer na warda a duna di konosé na EXTRA.

A haña informashon tambe di kura di kas ku a yena ku awa. Brantwer ta keda pendiente pa posibel kasonan ku por presentá den transkurso di dia.