WILLEMSTAD.- E siman tras di lomba a ku Kuerpo di Bombero mannan yen ku diferente kaso kaminda palunan a kai.

Bomberonan no solamente tei pa paga kandela pero nan ta hasi muchu mas. I e dianan aki ku nos suela ta saturá di awa, palunan ta krak i bin abou mas fásil, nan ta duna un man pa kita esakinan for di kaya.

Ta basta awa ta kayendo pa algun dia kaba tras di otro. Un bendishon sigur pa nos klima kalor, e ta trese poko fresku i matanan ta felis. Pero si otro banda e por kousa molèster tambe. E áwaseru ta pone ku tera ta bira hopi moli lokual ta pone ku palunan ta kèntel òf bini kompletu abou. Tabatin kasonan asta kaminda palu a kai i blòkia entrada di kas, skol òf kaminda públiko.

Ayera bomberonan a bai e.o den área di Veeris, Mundu Nobo, Brievengat, Steenrijk i tambe Kanga pa asina atendé ku vários di e kasonan aki. A kap e palunan te kaminda tabata por òf tabata nesesario pa asina aliviá e situashon un tiki.

Un bista riba e fotonan di bomberonan, subiendo te den palu pa por kap esakinan.