WILLEMSTAD.- Ayera Kazèrne na Rio Canario a keda será, despues ku un trahadó a tèst positivo na COVID-19. Pa awe tardi den kareda di 4 or pa 5 or e kazèrne lo habri su portanan.
Bosero di brantwer sr. Elroy Obispo a konfirmá e notisia aki pa EXTRA.
El a indiká ku ayera djaweps nan a haña notifikashon dje kolega ku a tèst positivo na Corona vírus. Mesora mando di brantwer a tuma e medidanan nesesario. A sera e kazèrne, miéntras e personal ku tabata traha huntu ku e kolega i ku mester a subi warda, no a laga nan bai traha, i a konsehá nan pa keda den karentena na kas.
Alabes huntu ku GMN a tuma tur e medidanan nesesario den e kaso aki.
Sr. Obispo a bisa ku pa e personal di brantwer tòg ta poko difísil pa mantené distansia sosial. Apesar di esaki, ta laga e koleganan bisti mondkapjes ora nan ta banda di otro.
A base dje situashon aki, a reforsá e kazèrne di brantwer nan di Mundu Nobo i tambe esun di Steenrijk ku mas personal. Naturalmente lo tin situashon kaminda si mester duna asistensia den rayon di Rio Canario, ku lo dura un tiki pa brantwer yega debí na e situashon.
Manera ariba indiká, pa awe tardi entre 4 or pa 5 or e kazèrne na Rio Canario lo ta habri atrobe pa duna servisio na komunidat.