...Foto Facebook di brantwer Kòrsou, kaminda ekiponan pisá ta traha pa yuda brantwer pa kaba di kombatí e kandela...

WILLEMSTAD.- Ayera tabata e di 3 dia ku brantwer ta tratando di kaba ku un kandela di fòrnu bastante grandi ku a surgi for di djaluna mainta na Seri Kandela.
Ayera Brantwer Kòrsou a informá ku ketu bai trabounan pa kombatí e kandela di fòrnu na Seri Kandela ta kontinuá riba e di 3 dia konsekutivo. Huntu ku ekiponan pisá i tambe bomberonan ta atendé pa por paga esaki den su totalidat.
Djaluna e kandela na Seri Kandela na altura di Kaya Sucre a surgi.
Brantwer Kòrsou a dirigí vários unidat na e sitio di e kandela pa kuminsá kombatí e kandela di mondi. Na e sitio Brantwer Kòrsou a konstatá ku ta trata di kandela grandi di mondi i mirando e embergadura di e kandela mester a hasi uso di tres “loader” tambe pa kombatí e kandela.
A limpia riba e tereno parti nort di e kandela, kaminda tin mondi pa evitá ku e kandela ta sigui ekspandé.
Djamars brantwer a sigui traha pa kaba di paga e kandela i ayera djárason tambe. Nan ta usando ekipo pisá p’asina por yuda nan pa kaba ku e kandela ku for di djamars ku ta produsí hopi huma i konsekuentemente ta kousa molèster pa abitantenan i besindario.