Ayera a surgi situashon konfuso djis un ratu

WILLEMSTAD.-Ayera nochi na Kirindongo Abou, na e sitio di e kaso lamentabel di asesinato ku a tuma, EXTRA a tuma nota ku na dado momentu a surgi un situashon un poko konfuso ya ku tantu polis komo brantwer tabata puntra pa lus. E kaso a tuma lugá den anochi i ta konosí ku e área ei no ta bon iluminá. Ademas ta importante pa polisnan por mira tur detaye na e sitio pa no pèrdè pistanan balioso pa e investigashon.

Den e kuadro ei EXTRA a aserka funshonarionan di brantwer pa puntra si akaso tin problema ku ekiponan nesesario pa brantwer por kumpli ku nan trabounan. Sr. Obispo a splika ku brantwer tin lus, pero nan mester ta responsabel pa nan prosesonan. Brantwer mester garantisa tur momentu ku nan por sigui kumpli ku nan tareanan.

Brantwer tin lus e.o riba e ‘rescuewagen’, pero den e kaso aki tabata trata un kaso di asesinato i no un emergensia ku tin mester di ‘rescuewagen’. Ku otro palabra si pone e ‘rescuewagen’ na e sitio pa duna lus i surgi un aksidente kaminda tin mester di lus esei por bira un problema.

Mas aleu sr. Obispo a duna di konosé ku den pasado brantwer tabatin un ‘licht aanhangwagen’ i esei por hasi uso di dje den kaso ku tin mester di lus pa un investigashon, pero esei no ta e kaso na e momentunan aki. Echo ta ku den e kaso di e asesinato na Kirindongo Abou brantwer a presentá un alternativa pa lus na momentu ku koleganan di polis no por a keda kla ku nan propio iluminashon.