WILLEMSTAD.- Ayera durante oranan di atardi sentral di polis a risibí informashon di un aksidente serio ku a tuma lugá den Roodeweg.
Segun informashon ku EXTRA ta disponé di dje ta indiká ku falta di preferensia un biaha mas tabata kousa ku shofùr di e motosaikel a bai dal den banda parti patras di un bùs. Na momentu ku e bròmer a aksidentá, esaki a pega kandela mesora.
Unidat di brantwer di Mundu Nobo a yega na e sitio di e aksidente na Roodeweg. Na nan yegada ya no por a hasi nada pa evitá ku e motosaikel a kima por kompletu. Patruyanan na e sitio mesora tambe a pidi presensia di ambulans di Fundashon Kuido di Ambulans pa transportá shofùr di e motosaikel ku a sali heridá i tambe el a risibí algun kemadura. Despues ku a dun’é promé asistensia, shofùr di e bròmer a keda transportá pa departamento di emergensia di hospital Sint Elizabeth pa tratamentu médiko avansá.