WILLEMSTAD.- E sektor energétiko un djesnan ku semper ta den diskushonnan masha bibu. No mester lubidá ku tur luna tin ahuste di e tarifanan, i semper ora ku tarifanan subi ta surgi diskushon riba esaki. Ta p’esei ta importante pa tin regulashon di e sektor energétiko i esun di kombustibel en partikular. Esei di akuerdo ku Minister di Desaroyo Ekonómiko, dr. Steven Martina, na okashon di selebrashon di e 25 aniversario di BTP.

Segun e mandatario, sigur si papia di e sektor di koriente i awa, dor ku nan por ser konsiderá komo monopolionan natural pa motibu ku nos isla ta muchu chikí pa kompetensia, regulashon ta sumamente importante pa asina garantisá ku e preisnan ta hustu i ku e kalidat ta haltu.

E mesun kos tambe ta konta pa regulashon di kombustibel. For di 2010 na momentu ku Kòrsou a bira outónomo, gobièrnu nan dje tempu ei a yega na e konklushon ku ta bon pa pone e kalkulashon di tarifanan di awa i koriente riba distansia, pues den man di un entidat independiente. I enbes di a lanta un órgano nobo a disidí di laga esaki resortá bou di BTP, kual tabata un bon eskoho. Enbes di lanta un entidat nobo, tabata mihó pa hasi uso di unu eksistente i amplia esei ku e konosementu nesesario pa e hasi e trabou.

I segun sr. Martina e ta kere ku durante e último dies añanan e trabou a ser hasí di un manera profeshonal, ophetivo i leu for di influensia polítiko. Kòrsou a ser sirbí dor di un kalkulashon di tarifanan di awa i koriente di un forma profeshonal.

Mas aleu el a trese dilanti ku lo ta bon pa BTP sigui desaroyá i no keda solamente na Telekomunikashon i Pòst, pero ku e lo por ta regulador di otro sektornan i asina bira un regulador multi-sektoral, pues un regulador ku ta ehersé e trabou aki riba vários aria. I esaki lo ta un tremendo perspektiva pa kresementu. BTP tin mas posibilidat pa sigui krese.

Pa loke ta trata e sektor energétiko el a  splika ku na 2018 e maneho energétiko  a keda ratifiká dor di konseho di minister (Natural Energy Policy of Curaçao) i aki e ròl di BTP a keda dokumentá i tambe un büró di energia ku lo resortá bou di MEO, i basá riba esei e trabounan ta sigui.

E ròl ku BTP a bin ta asumí durante e último dies añanan a bai na satisfakshon. Asta resientemente a sigui ku análisis i estudionan huntu ku BTP pa no solamente e kalkulá tarifanan pero tambe wak si no por bini un regulashon riba kalidat di kombustibel (gasolin/disel etc.), kual ta algu ku regularmente ta na diskushon den komunidat. Pe motibu ei e aria aki ta unu ku lo por konta ku mas regulashon, segun Martina.