WILLEMSTAD.- E uso di internèt ta mes vital ku awa i koriente awendia. P’esei ta importante pa komunidat por disponé di e mihó kalidat di internèt posibel. Opviamente e reklamo i kuestionamentu riba internèt a kontinuá den diferente área di e komunidat aki debí ku e kalidat ku e kompanianan ta brindando no ta kumpli ku e demanda. Bureau Telecommunicatie & Post (BT&P) por i ta midi kalidat di internèt na Kòrsou.

BT&P no ta ninga esei, pero di forma kategóriko e instituto ta splika ku lei no ta duna BT&P e outoridat pa duna sanshon ni tuma medida kontra un kompania ku faya ku e kalidat di internèt ku e mester brinda na su klientenan ku ta paga pa e servisio. Na palabra Giovanni King direktor operashonal di BT&P den deklarashon na EXTRA.

Ketu bai tin hopi diskushon riba e tema e.o den sentido ku ta splika e ròl di BT&P i kon e tareanan di supervishon a tuma lugá den pasado i kon esaki lo por sigui awor i den futuro. A splika tambe kiko e konseshon na kompanianan di telekomunikashon ta kome i bebe. Tambe ta indiká ku kada 5 aña mester inspekshoná e infrastruktura di telekomunikashon pa e instituto por keda garantisá e kalidat di infrastruktura i servisionan.

E punto ta ku hendenan ta puntra nan mes si den pasado tabata sosodé ku BT&P tabata aktua, dikon awor esei no por mas!

King tabata hopi kla na momentu ku el a indiká ku si den pasado BT&P tabata kontrolá kalidat di internèt i duna amonestashon i kisas asta duna but, simplemente tabata algu ku no tin base legal. E lei ta papia palabra hopi kla. Lei ta duna BT&P outoridat pa kontrolá kalidat di “spraak” pero e lei no ta papia nada di internèt. Pues huristanan awendia ta mustra e gerensia aktual ku definitivamente no por aktua sin ku internèt ta reglá den lei. Ta p’esei e gerensia aktual si a traha riba un konsepto di lei, i ta spera ku e ta keda aprobá mas lihé posibel.

BT&P ta midi kalidat di internèt i kaminda ku e kalidat ta bon nan ta bisa esei i kaminda ta malu tambe nan ta duna indikashon, solamente ku nan no tin outoridat pa bai mas leu por ehèmpel pone periodo di tempu den kua e kompania mester kumpli ku kambionan.

Bèrdat inspekshon di e infrastruktura ta kai bou di responsabilidat di BT&P. E inspekshon ku BT&P ta hasi ta riba e asina yamá “opgedragen diensten” kua ta telefonia, telex i telegraf. A base di normanan di kalidat por kontrolá tur kos i asta bisa algu riba dje, pero huristanan di BT&P a realisá ku tabata aktua pafó di e responsabilidat. No por keda aktua sin ku lei ta duna tal outoridat.

E manera ku e situashon ta awendia ku e pandemia di COVID, tin hopi mas uso di internèt tantu den empresanan komo na kasnan. Konsekuentemente e intensidat di usuarionan pa internèt ta muchu mas tantu durante di hinter dia i anochi. Ta nifiká ku si e kompanianan tabata kumpra internèt di e kalidat mas abou òf mediano e mester kuminsá pensa pa oumentá su kantidat i kalidat pa kumpli ku e demanda.

Islanan Boneiru, Saba i Statia (BES) si a kambia e lei i for di yanüari 2020 i tin un lei nobo a drenta na vigor. Na Kòrsou, BTP mes a tuma riba su mes i a traha riba un proposishon di kambio di lei. Pa por hasi algu ku internèt mester hink’é den lei. BES a kambi’é i p’esei aya si por aktua mesora.