WILLEMSTAD/AMSTERDAM.- E kompania di aviashon TUI tambe a hañ'é obligá di hasi sierto adaptashonnan den su skema di buelo pa awe i mañan. Den kòmbersashon ku un representante di TUI el a informá EXTRA entre otro ku nan ta sigui e desaroyonan dje sistema tropikal rònt di islanan-ABC hopi djaserka. Pasaheronan ku ta sali for di Schiphol pa Kòrsou ta ser informá di un ke otro via di mensahenan di SMS i ta rekomendá tur hende pa sigui instrukshon di outoridatnan lokal. Inisialmente a parse ku e buelonan pa i for di Kòrsou lo por a ser ehekutá, pero a duna prioridat naturalmente na seguridat di pasahero i e tripulashon di TUI.

Teniendo kuenta ku e último informashonnan di outoridatnan aki na Kòrsou, esta ku ta spera pasashi dje sistema mas tempran, lo nifiká ku no por transportá e pasaheronan di un forma 'safe' den bus pa airopuerto tampoko. Esei ta nifiká ku e buelo OR351 ku mester baha na Kòrsou ta ser desviá pa Punta Cana, Repúblika Dominikana. Pasaheronan ku lo mester a sali for di Kòrsou awe ku OR352 a ser informá via di un SMS.

E vakashonistanan lo tin di keda por lo pronto den nan akomodashon, miéntras ku TUI ta pidi e pasaheronan lokal pa no bai airopuerto. Tambe tin un buelo na kaminda for di Amsterdam via di Punta Cana pa Boneiru (OR703). Pero TUI lo sigui e desaroyonan hopi djaserka.