WILLEMSTAD.- Z-Air for di djadumingu ta enfrentando algun reto tékniko, loke a resultá den e kanselamentu di algun buelo, i adaptashon den ora di buelo.
For di djadumingu, dos di e avionnan Saab 340 di Z Air no a por a wòrdu usá debí na un desperfekto tékniko. Ounke ku e departamento di mantenshon a logra solushoná un
di e retonan relativamente rápido, pa e di dos avion, mester di un piesa ku mester bini for di Merka. Pa logra haña e piesa nesesario mas lihé posibel, Z Air a manda un enkargado Merka, pa
trese e piesa mas lihé posibel. Un reto aktual a presentá pa e echo ku pa motibu di klima di wenter, tin un disturbio den logístika na Merka. Esaki a pone piesanan
nesesario ta dura mas pa yega kaminda nan mester ta. Debí na e situashon ku a surgi, e kambionan di ora di buelo lo sigui por lo ménos den
transkurso di djárason. Z Air ta kontaktando pasaheronan afektá via e-mail i telefòn, pa informá nan di e kambionan den e orario di salida.
Z Air ta lamentá inkonvenensia ku tur esaki a kousa pa e pasahero, pero na mes momentu ta enfatisá ku no por hasi ningun kompromiso pa loke ta trata e seguridat.
Gerensia di Z Air ta ekspresá apresio pa e komprenshon di parti di pasaheronan, ku den sierto kaso a keda konfrontá ku un retraso basta signifikativo.
Gerensia a manda palabra di gratitut tambe pa e tim di Z Air ku den e dianan aki a traha te den oranan lat di anochi, pa yuda pasaheronan na e mihó manera posibel.