WILLEMSTAD.- Outor kurasoleño Elodie Heloise ta riba e lista largu pa e prestigioso premio literario hulandes, Libris 2024, ku su novela 'Blauwe Tomaten’ (Tomatinan Blou)'. E lista aki ta kontené diesocho outor ku ta kompetí pa e nominashon pa e premio riba e lista ku ta yamá ‘shortlist’. Heloise a wòrdu selekshoná for di 189 entradanan dor un hurado bou di liderazgo di Kim Putters.

E anunsio di e lista kòrtiku di seis buki ta planiá pa 11 di mart den programa Nieuwsuur riba kanal di televishon hulandes NPO2, kaminda e seis outor nominá lo risibí kada un 2.500 euro. E entrega di premio lo tuma lugá durante un gala na lokashon di evento Felix Meritis na Amsterdam.

Ku e nominashon pa e premio literario Libris Heloise ta risibí rekonosimentu for di mundu literario Hulandes. Elodie Heloise a duna di konosé kaba ku e tabata hopi sorprendí pa e anunsio di e lista largu. Blauwe Tomaten ta wòrdu publiká dor di editorial hulandes In de Knipscheer, ku semper tin atenshon pa outornan Karibense.

‘Blauwe Tomaten’ ta un historia profundo tokante kulpá, kastigu i pordon, ku ta tuma lugá na Kòrsou. E buki ta investigá temanan di pobresa, adikshon i abuzu, pero tambe di sakrifisio i rekonsiliashon. Heloise, nasé na 1968, a traha pa hopi aña den mundu di periodismo na Kòrsou. E tin un amor pa e ilsa i u esaki e tin un bos úniko den e literatura Karibense na Hulandes.