Pa mucha i hende grandi na SDK

WILLEMTAD.-Fundashon Desaroyo Deporte Kòrsou (FDDK) ta den nan siman di deporte “Sports Week”. Awe djadumingu e invitashon ta bai na tur mucha i hende grandi, ku por i ke move e sintura, pa na un forma deportivo bai partisipá na e evento di baila hula hoop. E aktividat ta tuma lugá di 5’or pa 7’or anochi awe djadumingu 17 di novèmber.
E aktividat aki ta grátis i ta tuma lugá paden, bou di dak na SDK. Tur partisipante ta haña un rekuerdo di nan partisipashon.

Dam i Schaak te 3’or

Den oranan di mainta a kuminsa e weganan basa riba mente. Ta trata di weganan e.o dam i schaak. Entre 9’or di mainta pa 3’or atardi muchanan ku tin interes por bai i asina siña kon ta hunga e weganan mihó.

Manera EXTRA a informá for di ayera, e tim di FDDK a keiru ku vários posibel invershonista ku por duna kontribushon pa drecha i hasi mantenshon di fasilidatnan deportivo na Kòrsou. Tin vários aktividat ta tuma lugá den kuadro di Sports Week.