WILLEMSTAD.- Buriku ku ta kana los riba kaya ta keda un problema. Na diferente okashon EXTRA a mustra riba e situashon aki, pero te ainda no tin un solushon. Doñonan di buriku no ta tene nan animal den nan kura i será.

Den dianan tras di lomba algun habitante di Buena Vista a bira víktima di burikunan ku ta kana los. E animalnan a drenta nan kura, kome nan mata i te nan ke wak ya e kura a keda limpi limpi sin mata den dje.

Ora buska pa sa ta ken ta doño di e burikunan, no por haña sa esaki. No solamente na mata pero tambe e animalnan aki ta kousa daño na otro propiedat. A resultá ku outo ta dal den buriku i ta keda pèrdí pasobra doño no ta sali.

Un apelashon un biaha mas pa doñonan di buriku tene nan animal den nan  kura i sòru pa e kura ta bon será.