WILLEMSTAD.- djamars vários but a kai pa negoshinan ku ketu bai ta kere ku nan por burla di outoridatnan durante di kontròl.
Tur dia e Tim Multidisiplinario ku ta konsistí di MEO, UBW/KPC ta subi kaya i ta sigui kontrolá establesimentunan. Nan ta kontrolá minimarket, snèk, supermarket, toko, kompanianan ku ta habrí, kompanianan di konstrukshon. Tur kaminda e tim ta move.
Na Luna Park Supermarket e tim a indiká na e propietario ku nan mester tin un persona spesífiko pa sirbi kliente na e kabinèt di “alles warm”. No ta permití pa kada kliente individual práktika "self service".
E negoshi Sweet & Blue B.V. a risibí un (1) but pa no ta hasiendo uso di entrega. A konstatá diferente kliente ku a bin tuma kuminda na e sitio.
E tim a para trabou di un kantor di atministrashon, kaminda a instruí e propietario pa stòp ku operashon. Aktualmente e trabounan ku e negoshi aki ta realisando no ta vital.
Na Tong Loon Restaurant, but a kai dor ku tabata sirbi kliente despues di orario di sera. Propietario tabata hasi e akto aki via di e porta patras di e negoshi.
Jay Liang Restaurant B.V.tambe a haña un but pa sirbi kliente despues di 6 or.