WILLEMSTAD -. Un shofùr hóben a sali di bon for di 3 infrakshon di tráfiko ku el a kometé.

E shofùr meskos ku mayoria outomobilista ku ta presentá dilanti hues pa but ku nan risibí, a presentá dilanti hues pa motibu ku e no tabata totalmente di akuerdo ku esaki.

E shofùr a wòrdu pará durante kontròl di tráfiko den su vehíkulo.

Segun e prosèsverbal, e no tabatin su reibeweis, papel di seguro ni di kùr.

Relashoná ku e 3 infrakshonnan aki, el a risibí na tur 1000 florin di but.

E shofùr a splika hues ku nèt el a kaba di tuma su vehíkulo i tabata bayendo kas.

El a bisa ku e ta disponé di un reibeweis pero esaki a kaduká i tabata den proseso pa renob’é.

El a trese e dokumentonan  pa hues i fiskal tira un bista. Pa loke ta trata seguro fiskal a bisa ku but pa seguro ta kosta 500 florin si e no ta na òrdu.

E shofùr a duna di konosé  ku su vehíkulo a keda konfiská, pero e no tin un trabou figo pa paga e but.

Fiskal den su rekisitorio a tene esaki na kuenta i a pone e but di 500 florin kondishonal pero mester paga esun di 250 florin.

Segun fiskal, si e no kumpli ku e pago e por bai 4 dia será. Hues ku mester a tuma un desishon a bai kompletamente di akuerdo ku fiskal.