WILLEMSTAD-. Un shofùr maskulino d 36 aña, a sali di bon for di 3 infrakshon di tráfiko ku el a kometé.

E shofùr meskos ku mayoria outomobilista ku ta presentá dilanti hues pa but ku nan risibí i ku no ta totalmente di akuerdo ku esaki, a presentá pa splika su desakuerdo.

A para e shofùr durante kontròl di tráfiko.

Segun e prosèsverbal, e no tabatin su reibeweis, papel di seguro ni papel di kùr.

Relashoná ku esakinan, el a risibí 3 but ku a suma na tur 1000 florin.

E shofùr a splika hues ku nèt el a kaba di kumpra su vehíkulo e dia ei i tabata bayendo kas.

El a bisa ku e ta disponé di un reibeweis pero nèt el a kaduká.

Segun e shofùr mas aleu,  promé ku el a haña but, e tabata den proseso pa un sita pa e bai saka su reibeweis.

Durante tratamentu di e kaso el a bin ku su reibeweis i komprobante di dia el a kumpra e outo pa hues i fiskal tira un bista.

Pa loke ta trata seguro, fiskal a bisa ku but pa seguro ta kosta 500 florin si e no ta na òrdu.

E shofùr a duna di konosé  ku su vehíkulo a keda konfiská, pero e no tin un trabou figo pa paga e but.

Fiskal den su rekisitorio a tene esaki na kuenta i a pone e but di 500 florin kondishonal.

Fiskal a bisa ku e akusado tin ku paga e but pa e dokumentonan di kùr ku tampoko e no tabatin na òrdu di kual esaki ta suma  250 florin.

Segun fiskal, si e no kumpli ku e pago e por bai 4 dia será. Hues ku mester a tuma un desishon a bai kompletamente di akuerdo ku fiskal.