Segun fiskal si e tabata na Merka lo el a kai será pa e akto aki

WILLEMSTAD.- Ayera korte di promé instansia a trata kaso di un akusado femenino desendiente merikano ku a kometé infrakshon di tráfiko riba nos isla.

Ta trata di A.L.(29)  nasé na Estádos Unídos ku ta keda akusá pa kore outo bou di  influensia di alkohòl dia 26 febrüari 2021.

Segun e akusashon durante un kontròl di tráfiko ku a tuma lugá e dia ei na altura di Dr. Martin Luther King Boulevard, polis a tuma nota ku e akusado tabatin wowonan basta kòrá.

Esei a pone ku e agentenan a laga e akusado supla pa midi e kantidat di alkohòl ku e tabatin den su sistema.

A resultá ku e tabatin 650 mikrogram di alkohòl den su sanger, miéntras lei ta permití ku un shofùr por tin 220 mikrogram den su sistema.

E akusado a bisa ayera ku e dia ei el a sali Mambo i bèrdat a dal algun ‘drinks’ ku su amigunan.

E sa ku e loke el a hasi tabata inkorekto i a hasi malu  di bai  kore outo bou di influensia di alkohòl.  Na momento ku polis a konstatá esaki, e agentenan a kita su reibeweis pa 8 dia pendiente tratamentu di su kaso.

Segun e akusado e tabata konfundí ku e reglanan di Merka. Fiskal a duna di konosé ku si tabata na Merka e lo a bai será i haña kastigu pa e komportashon iresponsabel aki.

Fiskal ta haña e akusashon kompletamente probá i a bisa ku el a tende niun ora so un motibu konkreto dikon e akusado a bai kore outo tòg sabiendo ku el a bebe un kantidat di alkohòl.

Mirando tur esakinan fiskal ta demandá e akusado na 1400 florin di but pa kore outo bou di influensia di alkohòl, mas 2 luna kondishonal sin reibeweis.

Hues den su desishon a bai kompletamente di akuerdo ku e demanda di fiskal.