Reibeweis a wòrdu kitá mes momento

WILLEMSTAD.- Korte di promé instansia a trata kaso di infrakshon di tráfiko, kaminda shofùr a kore outo bou di influensia di alkohòl.

E shofùr G.S(39) ta keda akusá di a kore outo fuma na  febrüari último.

El a splika ku e dia ei el a bai sali ku algun amigu i a bebe un kantidat di Hennessey kombiná ku Mònster.

Dor ku e ta un hende ku no sa bebe, el a bira hopi fuma. Na kaminda pa kas el a topa ku polisnan tabata hiba kontròl riba alkohòl.

E tambe mester a someté su mes na kontròl di kual e  mester a supla pa midi e kantidat alkohòl ku e tabatin na e momento ei den su sistema.

Ora ku el a supla, e aparato a midi 905 mikrogram ku ta muchu mas ku lei ta permití (220).

Mirando esaki polisnan a kita su reibeweis for di dje.

Durante tratamentu di e kaso, e shofùr  a aseptá ku bèrdat e tabata fuma.

El a bisa ku no ta su kustumber di bebe, pero e dia ei si el a bebe poko di mas.

El a pidi korte pa pordon’é i a supliká e tribunal pa dun’é su reibeweis bèk paso fo’i dia polis a kita su reibeweis tur dia e ta kana na pia bai trabou.

Fiskal den su rekisitorio a bisa entre otro ku Ministerio Públiko ta haña korementu di outo fuma, un akto hopi iresponsabel pa motibu ku e shofùr por kousa aksidentenan serio ku konsekuensia fatal. No solamente pa e shofùr so, pero pa e otro outomobilistanan i asta hende na pia.

Mirando tur esakinan fiskal a yega na un demanda di 1800 florin pa e akusado mas 120 dia di kual 52 kondishonal.

E akusado a bisa ku e no por paga e montante ei, debí na su situashon finansiero.

Wes den su desishon a haña e akusashon probá i a bai di akuerdo ku e demanda di fiskal.

Tambe wes a tene kuenta ku e situashon finansiero di e akusado i bisa ku e por paga su but den término di 6 luna i por haña su reibeweis bèk.