WILLEMSTAD.-Awe un bia mas outoridatnan a bai den e area di Dam Pretu na Banda Riba i a bolbe topa ku hendenan ku ta falta ku nos leinan. A topa ku kimamentu di gran kantidat di sushi. Pa di tantísimo bia mester a yama brantwer tambe pa atendé ku e situashon. Bon trabou di outoridatnan ku a sigui vigilá e situashon den e area aki.

Pa basta tempu  kaba outoridatnan ta atendé ku hendenan ku ta sigui basha sushi den e area di Dam Pretu i alabes ta hòrta tereno, sende kandela pa kima sushi i asta ta koba buraku grandi pa kima karbon. Segun lei, awendia  pa kima palu pa traha karbon mester tin pèrmit. Sinembargo tin hendenan ta bai den e area ei i ta sigui hasié. Awe si but pisá a kai ora ku outoridatnan a duna e persona enkargá but na rason di 3000 florin.

Manera indiká ta hopi bia kaba ku ta bai i ta papia ku e personanan den e area pa mustra nan ku loke nan ta hasi ta kontra di nos leinan. Asta tabatin momentu ku for di ora ku polis yega tin hende ta saka kareda kore bai. Awe atrobe outoridatnan a topa ku bashamentu di sushi na gran eskala i tambe a topa ku dos fòrnu bou di tera. A yama brantwer pa paga e kandelanan i despues polis ambiental a klap e hendenan but na rason di 3000 florin.

Ta bon pa bisa ku siman pasa tambe a parti but pero no tabata pa sumanan asina haltu. Ayera a topa ku loader ta koba pa traha fòrnu i stòp e trabou. Awe a bai topa e buraku koba i ya kaba tabata kimando palu. E situashon a sali for di man i ta bira hopi nesesario pa aktua ku man duru rònt Kòrsou. Mas detaye den edishon di EXTRA.