WILLEMSTAD. – Resientemente durante kasonan di infrakshon di tráfiko  un studiante shofùr di 20 aña, a bin korte pa atmití ku el a pasa den lus kòrá pero no por a paga e but.

El a konta ku e dia ei e tabata bayendo un djòp i tabata hopi lat.

El a splika mas aleu ku e no a mira e lus kambia i no a realisá ku e tabata pasando den lus kòrá.

El a bisa ku e ta traha “part time”  i ta bai skol.

Fiskal a haña e akusashon probá i a demandá e akusado na 250 florin pa pasa den lus kòrá i 250 florin pa kore di forma  iresponsabel.

Hues no a mira motibu pa desviá i a bai di akuerdo ku e demanda di fiskal.

E akusado a pidi pa paga e but den término debí ku ta djòp e ta kue. Tantu fiskal komo hues a bai di akuerdo pa e shofùr paga e but den término di 5 luna.